लाेकपाटी न्यूजकाठमाडौं, ११ असोज । बुधबार राति बसन्तपुरमा इन्द्रजात्राको छैठौं दिन श्वेत भैरवको मुखमा राखिएको पाइपबाट बगेको जाँड प्रसादको रुपमा महिलाहरुले मात्र ग्रहण गरेका छन् । महिलाहरुले मात्रै ग्रहण गर्ने चलनअनुसार महिलाहरुले जाँड खान तँछाडमछाड गरेका हुन् ।
इन्द्र जात्राको छैटौं दिन भैरवको पछाडि ‘तेप’ भन्ने घ्याम्पोमा राखिएको जाँड पाइपबाट मुखमा ल्याइएको हुन्छ ।
८ दिनसम्म मनाइने यो जात्रामा हनुमानढोकामा रहेको श्वेत भैरवको विशाल मूर्तिको मुखमा जोडिएको पाइपबाट प्रसादको रुपमा जाँड बगाइन्छ । यही जाँडलाई प्रसादका रुपमा खाने प्रचलन रहेको छ । यो प्रसाद खाएमा निरोगी हुने विश्वास छ ।
पहिले यो जाँड पुरुषहरुले मात्रै खाने प्रचलन थियो । पाँच वर्ष अघिबाट महिलालाई पनि एक दिन विशेष दिनका रुपमा छुट्टाएर खुवाउने प्रचलन सुरु गरिएको हो । पाँच वर्षअघि ‘श्री श्वेत भैरव हाथा हायकेगु व्यवस्थापन समिति’ ले यो परम्परा सुरु गरेको हो ।
समितिकी सचिव ज्योत्सना सिन्दुराकारले महिला र पुरुषलाई समान व्यवहार गर्नका लागि यस्तो परम्परा सुरु गरेको बताइन् ।
