साम्राज्यवादसामू झुक्दैनौं : रमेश मल्ल

Ramesh Malla
लाेकपाटी न्यूज

काठमाडौं, १५ माघ । अखिल (क्रान्तिकारी) का पूर्व केन्द्रीय अध्यक्ष रमेश मल्लले क्रान्तिकारी युवा र नेकपा साम्राज्यवादसामू नझुक्ने बताएका छन् ।

सानोठिमी क्याम्पस भक्तपुरमा अखिल (क्रान्तिकारी) र अखिलको संयुक्त आयोजनामा भलिबल प्रतियोगिताको उद्घाटन र नवआगन्तुक विद्यार्थीलाई स्वागत कार्यक्रममा बोल्दै युवा नेता मल्लले भेनेजुयलामाथि अमेरिकी आक्रमण आफूहरुका लागि मान्य नहुने बताए ।

कार्यक्रममा नेता मल्लले भने, ‘अमेरिकी साम्राज्यवादले भेनेजुयलामाथि गरेको हस्तक्षेपको निन्दा गर्नु हरेक स्वतन्त्र राष्ट्र र जनताको कर्तव्य हो, अधिकार हो । अमेरिकी दूतावासको प्रतिक्रिया विश्वव्यापी कम्युनिस्ट पार्टी र सरकारका विरुद्ध हस्तक्षेपको हिस्सा हो । हामी कसैको गुलाम होइनौं ।’

नेकपाका अध्यक्ष प्रचण्डले अमेरिकी हस्तक्षेपका विरुद्ध जारी गरेको विज्ञप्तिलाई लिएर अमेरिकी दूतावासले सरकारको आधिकारिक धारणा मागेकोमा नेता मल्लले आक्रोश पोखे । मल्लले भने, ‘हामी विश्व सर्वहारा वर्ग र श्रमजीवी जनताको पक्षमा छौं, हाम्रो आफ्नै विश्वदृष्टिकोण छ, राजनीति छ । हामीले हाम्रो राजनीतिक पक्षधरता प्रस्तुत गर्दा स्पष्टिकरण सोध्ने अधिकार कसैलाई छैन ।’

मल्लले साम्राज्यवादको ‘फुटाउ र शासन गर’को नीति धेरै समय नटिक्ने बताए । उनले भने, ‘अब विश्वमा एक ध्रुव मात्र छैन, विश्व बहुध्रुवमा विभाजित हुँदैछ । भेनेजुयलामाथिको हस्तक्षेप फुटाउ र शासन गर नीतिकै अर्को रुप हो, त्यो आपराधिक मानसिकता हो । हामी भेनेजुयला र राष्ट्रपति निकोलस मादुरोको पक्षमा दृढतापूर्वक उभिन्छौं ।’

मल्लले कम्युनिष्टहरु संसारभरिको शोषण र अत्याचारको पक्षमा उभिनुपर्ने बताए । उनले भने, ‘हामी कम्युनिष्ट हौं, विश्वभरि जुनकुनै ठाउँमा हुने शोषण, अत्याचार र हस्तक्षेपको हामी विरोधी हौं । हामी विश्वन्धुत्व चाहन्छौं, यसमा हाम्रो कसैसँग सम्झौता हुँदैन । हाम्रो ऐक्यवद्दता जारी रहन्छ ।’

बेपत्ता योद्धा पोखरराज बुढाथोकी सम्झना गर्दै मल्लले भने, ‘सानोठिमी क्याम्पस क्रान्तिकारीको रक्तरन्जित भूमि हो, अब यो एकतावद्द अखिलको नेतृत्वले निरन्तरता दिनेछ । एकीकृत अखिलले शहिद र बलिदानीको गौरवशाली गाथा कायम राख्नेछ ।’

भर्खरै संसदबाट पारित भएको चिकित्सा शिक्षा विधेयकको विरोध गर्नुको अर्थ नभएको मल्लले बताए । उनले भने, ‘कांग्रेसले झुटको खेती गरिरहेको छ, विधेयकमा १–२ वर्षमा नै कुनै मेडिकल कलेजलाई सम्बन्धन दिने अवस्था छैन । गोविन्द केसीका पछि लागेर कांग्रेसको भलो हुँदैन ।’

मल्लले तोकिएकै मितिमा स्ववियू निर्वाचन हुने पनि बताए । ‘लोकतन्त्र सबैले मान्नुपर्छ, यो सबैका लागि हो’ मल्लले भने, ‘कांग्रेस र नेविसंघ स्ववियू निर्वाचनबाट भाग्न खोज्दैछ, निर्वाचनबाट भाग्नकै लागि आन्दोलनको कुरा गरिएको हो । तर, निर्वाचनबाट कोही भाग्न सक्दैन, भाग्न दिँदैनौं ।’

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्