लाेकपाटी न्यूजकाठमाडौ, १९ पुस । ‘इनोभेटर’ इ. दीपेन्द्र कँडेले वाइडबडी विमान खरिद प्रकरणमा छानबिन गर्न गठित संसदीय छानबिन समितिले सार्वजनिक गरेको प्रतिवेदन गलत र अपूरो भएको टिप्पणी गरेका छन् ।
रिपोर्टर्स क्लब नेपालमा पत्रकार सम्मेलन गरेर कँडेलले वाइडबडी घोटाला प्रकरणमा छानबिन समितिले सार्वजनिक गरेको प्रतिवेदन अधुरो भएको दाबी गरेका हुन् । उनले विमान खरिद प्रक्रिया राष्ट्रियमात्रै नभएर अन्तर्राष्ट्रिय सरोकारको विषय भएकोले यसमा घोटाला भएको वा नभएको भनी छानबिन गर्न नेपालको समितिले मात्रै गरेर पूरा नहुने जिकिर गरे ।
कँडेलले भने, ‘यो प्रकरणमा छानबिन गर्नका लागि आइकाओ, हाई–फ्लाई र एयरबसको समेत सहभागिता हुनुपर्छ । नेपालको समितिले मात्रै छानबिन गरेर ल्याएको प्रतिवेदन अधुरो र अपूरो हुन्छ । त्यसैले यसलाई वैधानिकता दिनको लागि पनि अन्तर्राष्ट्रिय सरोेकारवालाहरुलाई पनि सहभागिता गराउनुपर्छ ।’
उनले विमान किनेको नभई भाडामा ल्याइएको पनि दाबी गरेका छन् । उनले भने, ‘नेपालले वाइडबडी खरिद गरेको होइन, भाडामा ल्याएको हो । हाई–फ्लाई कम्पनीबाट भाडामा ल्याएको वाइडबडी घोटालाका बारेमा नेपाल सरकारले एउटा प्रतिवेदन तयार पार्छ, नेपालमा रहेका केही मन्त्री, कर्मचारीलाई कारबाही गर्ला तर त्यो न्यायोचित हुँदैन, आइकाओ, हाईफ्लाइ, एअरबसमाथि पनि छानविन हुनुपर्छ।’
उनले आफू पनि यही ‘फिल्ड’मा अध्ययन तथा अनुसन्धान गरिरहेको व्यक्ति भएको नाताले यो प्रकरणको वास्तविक सत्य, तथ्य बाहिर ल्याउनका लागि आवश्यक परे सहयोग गर्न आफू तयार रहेको सुनाए ।
त्रिभुवन अन्तर्राष्ट्रिय विमानस्थल गुणस्तरहिन भएकाले यसलाई तत्काल कानूनी रुपमा बन्द गर्न आफू लागेको पनि उनले टिप्पणी गरे । उनले भने, ‘नेपाललाई आइकाओले कालो सूचिबाट हटायो भनेर गलत सूचना दिइएको पाइन्छ, यूरोपका देशरुहरुमा नेपाली जहाज उड्न पाउँदैन, यो सब हुनुको पछाडी हाम्रो विमानस्थल हो ।’
अन्तर्राष्ट्रिय अदालतमार्फत यो प्रकरणको छानविन हुनु्पर्ने उनको जोड छ । उनले भने, ‘म त्यही माग गर्न यहाँ आएको हुँ, अनुसन्धानको दायरा फराकिलो बनाउनुपर्यो, लेखा समितिले यस प्रकरणबारे अत्यन्तै साँघुरो रुपमा प्रतिवेदन ल्याएको छ।’
उनले अघि थपे, ‘सिभिल अर्गनाइजेशनको माध्यमबाट म देशको दुर दशालाई हटाउनुपर्छ भनेर लागेको मानिस हुँ, यो वाइडबडी कुन देशबाट ल्याएको भन्ने कुरासमेत संसदीय छानबिन समितिलाई थाहा छैन, वाइडबडी पोर्चुगलबाट ल्याएको हो।’
उनले हाइफ्लाइबाट भाडामा ल्याएको विमानमा कति जना नेपाली पाइलट छन् ? यसको उत्तर कसैले दिन्छ ? भन्दै उल्टै प्रश्नसमेत तेर्साए । कँडेलले थपे, ‘के नेपाली पाइलटहरु अयोग्य हुन त ? होइन, भने वाइडबडी उडाउन किन विदेशी विमान चालक ल्याइयो त ?’
