लाेकपाटी न्यूज
बाजुरा, २० फागुन । बाजुराका दुर्गम गाउँहरुमा प्रविधिमैत्री सेवा सहितको कामकाज शुरु भएको छ। बाजुरा जिल्लाको बडिमालिका नगरपालिकाका नौ वटै वडाबाट प्रविधिमैत्री सेवा सहितको कामकाज शुरु गरिएको हो ।
नगर प्रमुख पदम बडूवालले सेवाग्राहीलाई प्रविधिमैत्री र छिटोछरितो सार्वजनिक सेवा प्रदान गर्ने उद्धेश्यले जिल्लामै पहिलोपटक बडिमालिका नगरपालिकाले प्रत्येक वडामा इन्टरनेट सुविधा जडान गरेको बताए । कम्प्युटरमा सफ्टवेयरको प्रयोगका लागि इन्टरनेट सुविधा आवश्यक भएको र समयानुकूल सार्वजनिक सेवा छिटोछरितो र सहज किसिमले प्रदान गर्नुपर्ने हुँदा विशेष महत्वका साथ इन्टरनेट जडान गरिएको उनको भनाइ छ ।
ई–बडिमालिका नगरपालिका सहितको नारा लिएर इन्टरनेट जडानको योजनालाई पहिलो प्राथमिकतामा राखिएको नगरपालिकाका उप प्रमुख कविता विष्टले बताउँछिन् । यस्तै सबै वडामा कम्प्युटरको माध्यमबाट कामकाज सञ्चालन गर्ने बडिमालिका जिल्लामै पहिलो नागरपालिका भएको बडिमालिका नगरपालिकाका प्रशासकीय अधिकृृत हीरालाल भण्डारीले जानकारी दिए । वडा कार्यालयमै इन्टरनेट सुविधा हुँदा दैनिक कामकाज सहज भएको उनको लावी छ ।
सो नगरपालिका–२ का वडाध्यक्ष डम्मर महतले भने, ‘चिठीपत्र बोकेर पु¥याउनुपर्ने, लिखित कागजात बोकेर आदानप्रदान गर्नुपर्ने र सेवाग्राहीलाई पनि केही सच्याउनुपर्ने समस्या भए केही दिन कुर्नुपर्ने अवस्था थियो तर प्रविधिमैत्री वडा कार्यालय बनाएसँगै यी सबै समस्या समाधान भएको छ ।’
सेवाग्राहीलाई छिटोछरितो, सहज र पारदर्शी सेवा प्रवाहका लागि नगरपालिकाले प्रविधिमैत्री वडा निर्माणमा विशेष महत्व दिएको नगरपालिकाका सूचना अधिकृत हेमबहादुर थापाले बताए । इमेल इन्टरनेट सञ्चालन गर्नका लागि मात्रै होइन, जन्मदर्ता, सामाजिक सुरक्षा भत्ताको लगत संकलन, विभिन्न तथ्याङ्क दाखिला गर्नदेखि वडाबाट प्रदान गरिने विभिन्न सेवा सुविधा प्रदान गर्नका लागि इन्टरनेट सुविधा जडान गरिएको छ । यसले सेवाग्राही र कर्मचारी दुबैलाई सहज भएको बडिमालिका नगरपालिका– १ का वडा सचिव मदन दानीको भनाइ छ ।
प्रत्यक वडा कार्यालयमा मात्र नभइ नगरपालिकाभित्रका विद्यालय, स्वास्थ्य संस्था लगायतका क्षेत्रमा पनि इन्टनेटको सुविधा जडान गर्ने नगरपालिकाको लक्ष्य छ । इन्टरनेटको माध्यमबाटै नियमन र निगरानी समेत नगरपालिकाबाटै गर्न सक्ने गरी आवश्यक तयारी गरिएको नगर प्रमुख पदम बडूवालले बताए ।
प्रविधि जडान प्रक्रिया खर्चिलो भए पनि सार्वजनिक सेवा सहज र प्रभावकारी रुपमा प्रवाह गर्नका लागि सबै वडा कार्यालयमा इन्टरनेट सेवा जडान गरिएको छ । यसकै माध्यमबाट विद्युतीय हाजिरीदेखि कर्मचारी आएको नआएको, समयमा सेवा प्रवाह गरेको नगरेको, सेवाग्राहीसँग कर्मचारीको व्यवहार राम्रो गरेको नगरेको तथा विद्यालयमा पढाइ भए नभएकोजस्ता कार्यको निगरानी गर्नका लागि नगरपालिकाले यो अवधारणा अघि सारेको प्रमुख बडूवालकाे भनाइ छ ।
नगरपालिकाभित्रका सबै काम पेपरलेस र डिजिटलाइजेशन गर्ने लक्ष्यअनुसार वडामा ई– सूचना प्रणाली समेत जडान गर्ने कार्यलाई अगाडि बढाएको छ । अहिलेको प्रविधिको युगमा जुनसुकै काम गर्दा पनि इन्टरनेट सेवा आवश्यक हुने गरेको छ ।
इन्टरनेट जडानसँगै सदरमुकाम मार्तडी आएर बस्ने, नगरकार्यालयमै कामकाज गर्ने वडा कर्मचारी र वडाध्यक्ष पनि वडा कार्यालयमै बस्न थालेका छन् । विश्व दुनियाँसँग साक्षात्कार हुन इन्टरनेटले सुविधा दिएपछि मार्तडी आउन आवश्यक नरहेको वडा नं ५ का वडाध्यक्ष बलबहादुर थापाले बताए ।
प्रविधिले कामलाई मात्र छिटो र सहज बनाएको छैन्, सेवाग्राहीको आवातजावतमा लाग्ने खर्चमा समेत कमी ल्याएको छ भने आवश्यक ज्ञान सीप सिक्नमा समेत अवसर दिने गरेको जनप्रतिनिधिको भनाइ छ । नगरपालिकाभित्र रहेका १, ७, ५ र ६ नं वडा बढी दुर्गममा पर्दछन् । सेवा जडानपछि टाढाका वडा कार्यालयमा पनि सदरमुकाम भित्रकै जस्तो अनुभूति हुने गरेको कर्मचारीको भनाइ छ ।
