‘ओलीलाई म ठीक ठाउँमा ल्याउँछु’ : बामदेव गौतम

bamdev gautam
लाेकपाटी न्यूज
0 Shares

काठमाडौं, २२ फागुन । नेपाल कम्युनिस्ट पार्टी (नेकपा)का सचिवालय सदस्य वामदेव गौतमले प्रधानमन्त्री एवं नेकपा अध्यक्ष केपी शर्मा ओलीलाई आफूले ठिक ठाउँमा ल्याउने बताएका छन् ।

हेलिकप्टर दुर्घटनामा निधन भएका मन्त्री रवीन्द्र अधिकारीप्रति श्रद्धाञ्जलि अर्पण गर्न नेकपानिकट विद्यार्थी संगठनले बुधवार त्रिभुवन विश्वविद्यालय कीर्तिपुरमा आयोजना गरेको श्रद्धाञ्जलि सभालाई सम्बोधन गर्दै उनले कतिपयले आफ्नो आलोचना पचाउन नसके पनि आफूले भने आलोचना गरेरै सही ठाउँमा ल्याउने बताएका हुन् ।

कार्यक्रममा बोल्ने क्रममा नेता गौतमले भने, ‘पुष्पलालबाहेक हरेक महासचिव र अध्यक्षसँग मेरो टकराब भएको छ । सीपी मैनाली महासचिव भएको बेलामा उहाँसित लडाईं गरेँ । त्यसपछि झलनाथ आउनुभयो, उहाँको कमी कमजोरीको कमिटीमा खुलेर बहस छलफल गरेँ । त्यसपछि मदन भण्डारी आएपछि पनि मेरो त्यही थियो शैली । त्यसपछिका अध्यक्षसँग पनि त्यही भएको छ । कतिपयले त्यसलाई पचाउन सक्दा रहेछन्, कतिले त्यसलाई पचाउन नसकेर मलाई बदनाम गर्यो भन्छन् । म त्यससित डराउँदिन आलोचना गरिरहन्छु ।’

उनले कुनैपनि व्यक्तिको बारेमा क्रिटिकल एप्रोचमा मूल्यांकन हुनुपर्ने भन्दै जसको पनि आलोचना मुखैअगाडि गर्ने आफ्नो सिद्धान्त रहेको बताए ।

गौतमले आत्मविश्वासकासाथ भने, ‘मैले कमरेड केपी ओलीलाई संसदीय दलको नेता बनाउन प्रमुख भूमिका खेलेँ । पार्टी अध्यक्ष बनाउन भूमिका खेलेँ । दुई पटक प्रधानमन्त्री बनाउन जुन वातावरण बन्यो, त्यसमा मेरो एक नम्बरमा नाम छ । मैले त्यसो गरेको छु, तर केपी ओलीसँग संघर्ष गर्ने व्यक्ति म मात्र छु, अरूले गर्दैनन् । मलाई विश्वास छ, मैले आलोचना गरेर मात्र उहाँलाई सही ठाउँमा ल्याउन सक्छु ।’

यसै सन्दर्भमा उनले कम्युनिस्ट पार्टीका नेताहरूको प्रसंशा गर्नु आवश्यक नरहेको बताए ।

उनले भने, ‘मेरा पनि कतिपय असन्तुष्टि थिए, एउटा मिडियाले सोध्यो– तपाईं सन्तुष्ट हुनुहुन्छ ? मैले छैन भनेँ । तर अहिले सन्तुष्ट हुन लागेको छु । प्रधानमन्त्री र सरकारका अर्थमन्त्रीले आज नगरे पनि अब गर्न लागेका छौँ भन्नुभएको छ । अब गर्नका लागि चार वर्ष छ । घोषणा पत्रमा भएका सबै काम गर्छु भनेपछि म गद्गद् भएको छु, कुरा सुनेर,’ गौतमले भने, ‘तर गर्नुहुन्छ कि गर्नुहुन्न, म हेर्छु । आगामी बजेट हेर्छु । त्यसपछि म अगाडि जान्छु । फेरि पनि त्यस्तै भयो भने मेरो कर्तव्य हुन्छ मैले रोक्नैपर्छ, हस्तक्षेप गर्नैपर्छ, त्यतिबेला । नेपाली जनताले चाहेको व्यवस्था, नेपाली जनताले चाहेको समृद्धि कायम गर्नुपर्छ । त्यो समृद्धि भनेको आँखाले देख्ने गरी आउनुपर्छ । हामीले घोषणापत्र जनताको मत ल्याउनका लागि मात्र, झुक्याउनका लागि मात्र बनाएको होइन । हाम्रो प्रतिबद्धता, हाम्रो संकल्पलाई जनताले समर्थन गरेको छ । दुईतिहाइ सिट प्राप्त हुने गरी जनताले त्यसलाई अनुमोदन गरेका छन् । त्यो घोषणापत्रलाई पूरा गर्ने हाम्रो जिम्मेवारी हो । त्यसलाई पूरा गर्छौं ।’

कार्यक्रममा नेता गौतमले रवीन्द्र अधिकारीको कार्यशैलीको प्रसंशा गर्दै उनलाई आफ्नो दिलभित्र बचाइराखेको पनि बताए ।

प्रतिक्रिया दिनको लागि यहाँ क्लिक गर्नुहोस्

Notice: Undefined variable: aria_req in /home/blogging/lokpati/wp-content/themes/patrik/comments.php on line 29

Notice: Undefined variable: aria_req in /home/blogging/lokpati/wp-content/themes/patrik/comments.php on line 34

तपाईंको प्रतिक्रिया यहां लेख्नुहोस्