लाेकपाटी न्यूज
काठमाडौं, २५ फागुन। सवारी साधनामा यात्रा गर्दा तपाईंमध्ये धेरैलाई रिगटा लाग्ने र वान्ता हुने समस्या हुन सक्छ। कतिपय मानिस त झन् वान्ता भएकै कारण बिरामीसमेत हुन्छन्। बस, ट्याक्सी तथा हवाइजहाज चढ्दा अधिकाश मानिस वान्ता गर्छन्। तर, कतिपय भने सवारी साधनको गन्धले नै वान्ता गर्ने पनि हुन्छन्।
यात्रा गर्दा शरीरका इन्द्रियहरुले सन्तुलित ढंगबाट आफ्ने कार्य गर्न नसक्दा वान्ता हुने समस्या आउँछ। यसरी यात्रा गर्दा वान्ता हुनुलाई सिकनेस् अर्थात यात्राजन्य वान्ता भनिन्छ। यो समस्या हरेक मानिमा फरक–फरक हुन्छ। कोही मानिमा यात्रामा निस्कन साथ वान्ता गर्न थाल्छन् भने कसै कसैलाई लामो यात्रा गर्दा समस्या देखा पर्छ। वान्ता हुनु आफैंमा एक कष्टकर क्षण हो।
शरीरलाई कमजोर बनाउनुका साथै यस्तो समस्याले यात्राको रमाइलोपन समेत हराएर जान्छ। यदि तपाइ यस्तो समस्या भोगिरनु भएको छ भने आफैंले कहि घरेलु उपायबाट समस्याको समाधान गर्न सकिन्छ। जेठीमधु यो मधुर र स्निग्ध गुणयुक्त हुने भएकाले आमाशयको अम्लता कम गर्दछ। साथै आमाशयको वायुलाई पनि कम गर्छ। अतः यात्रा गर्दा जेठीमधुका टुक्राहरु मुखमा राखेर चुसिरहनु फाइदाजनक मानिन्छ।
ल्वाङ्ग मुखमा राखेर चुसेर यात्रा गर्दा पनि वान्ता हुने समस्याबाट मुक्त हुन सकिन्छ। त्यसैगरि जामुनको फल र यसका पातहरुमा वान्ता रोक्न सक्ने औषधीय गुण हुन्छ। जामुन पत्रको रस निकालेर यात्रा गर्नुपूर्व पिउने वा यात्राको बीच–वीचमा अलि अलि रस पिउँदा पनि वान्ता हुँदैन। साथै जामुनको फल नै फलफूलका रुपमा प्रयोग गर्दा फाइदा पुग्छ।
काँचो आँपले खानामा रुचि लगाउँछ, खाना पचाउन सहयोग गर्छ। त्यही आँपको पातले वान्ता रोक्ने काम गर्छ। यसर्थ यात्रा गर्दा आँपको पातको रस निकालेर बीच बीचमा पिउने गर्नुपर्छ। यसो गर्दा वान्ता हुने समस्याबाट छुटकारा पाउन सकिन्छ। सौंफले पनि वान्ता रोक्ने काममा मद्दत गर्छ। यात्राका क्रममा मुखमा सौंफ राखेर चपाइरहँदा वान्ता हुँदैन।
अदुवा आर्युवेदिक औषधिमा समेत अति नै प्रयोग गरिन्छ साथै रुघाखोकी, अरुचि आदिमा पनि अदुवाको प्रयोग गरिन्छ। दैनिक भान्सामा प्रयोग हुने अदुवामा वान्ता रोक्ने औषधीय गुण हुन्छ। यसरी यात्राका क्रममा अदुवाका टुक्रा मुखमा राखेर चुसिरहँदा वान्ता हुने समस्याबाट मुक्ति पाउन सकिन्छ।
