लाेकपाटी न्यूज
काठमाडौं, ७ चैत । प्रधानमन्त्री केपी शर्मा ओलीले परिवारसहित नेपाली चलचित्र ‘क्याप्टेन’ हेरेका छन् । फागु पूर्णिमाको अवसरमा उनले आफ्ना पिता र पत्नीसाथ कमलपोखरीस्थित सिटी सेन्टरमा गएर चलचित्र ‘क्याप्टेन’हेरेका हुन् ।
नेपाली चलचित्रका स्थापित नायक भुवन केसीद्वारा निर्माण गरिएको चलचित्र ‘क्याप्टेन’मा फुटबल खेलसँग आधारित कथावस्तु छ । नायक अनमोल केसीको मुख्य भूमिका रहेको उक्त चलचित्रले खेल क्षेत्रमा देखिएका विकृति र विसङ्गति अन्त्यका लागि डटेर निरन्तर लागेमा सफलता सम्भव छ भन्ने सन्देश दिएको छ ।
चलचित्र हेरेपछि मिडियाकर्मीलाई संक्षिप्त प्रतिक्रिया दिँदै प्रधानमन्त्री ओलीले आफूले अनमोल केसीलाई नचिनेको बताए । अनमोल केसी कस्तो लाग्यो भन्ने प्रश्नको जवाफ दिदैँ प्रधानमन्त्री ओलीले ठट्यौली शैलीमा भने, ‘अनमोल केसी त चिन्या छैन मैले, इशान खड्का मात्र चिन्या हो ।’ प्रधानमन्त्रीको प्रतिक्रिया सुनिरहेका अनमोल केसी मुसुमुसु हाँसिरहेका थिए ।
एउटा राम्रो प्रतिभा भए पनि फुटबल क्षेत्रमा स्थापित हुन कति चुनौती र सङ्घर्ष गर्नुपर्छ भन्ने सन्देश प्रवाह गरेको उक्त चलचित्रमा प्रतिभाको पहिचान गर्ने सामथ्र्य बढाउन पनि आवश्यक रहेको देखाएको छ । मुलुकमा कानून र नीति भए पनि त्यसको प्रभावकारी कार्यान्वयमा देखिएको समस्याको पक्षलाई पनि चलचित्रले उजागर गरेको छ ।
