लाेकपाटी न्यूजकाठमाडौं। नेपाली कांग्रेसका नेता प्रकाशमान सिंहले विकास बजेटसमेत खर्च गर्न नसकेको वर्तमान सरकारले लगानी सम्मेलनमा ठूलठूला कुरा गर्नु हास्यास्पद भएको टिप्पणी गरेका छन्। विदेशी लगानी नेपालमा भित्राउने कुरा सकारात्मक भए पनि त्यसका लागि वातावरण बनाउन नसकेको उनले बताए।
शनिबार काठमाडौंमा आयोजित एक कार्यक्रममा पूर्वउपप्रधानमन्त्री समेत रहेका नेता सिंहले भने, ‘एकातिर विदेशी लगानी ल्याउनुप¥यो भन्ने, अर्कोतिर आफूले प्रस्तुत गरेको विकासको बजेट खर्च गर्न नसक्ने क्षमता नभएको सरकारले ठूलठूला कुरा गरेर जनताले पत्याउन सक्छ ?’ पहिला खर्च गर्ने सामर्थ्य बढाउनुपर्छ।’
लगानी सम्मेलन जारी रहेकै बेला प्रदेश २ मा कमजोर सुरक्षाका कारण प्रश्नपत्र आउट भएर एसईई परीक्षा रद्ध हुनु लज्जाको विषय भएको उनले बताए। ‘लगानी सम्मेलन भइरहेको बेला दुई नम्बर प्रदेशमा एसईई परीक्षा रद्ध भयो। यसले सक्षमताका साथ नेतृत्व गर्न नसकेको प्रमाणित हुन्छ’ सिंहले भने।
सरकारले शान्ति सुरक्षाको र लगानीको वातावरण बनाउन नसकेकाले घाटा खान विदेशी लगानीकर्ता नआउने उनले बताए। ‘विदेशी लगानी ल्याउने राम्रो कुरा हो। तर, सरकारले तीनै तहमा जनताले सुशासनको अनुभूति दिलाउन नसकेपछि जतिसुकै ठूला कुरा गरेर के गर्ने ?’
मुलूकसामु सुरक्षा चुनौति रहेकाले सबैलाई सम्वादमार्फत् मुलधारमा ल्याउनुपर्ने उनले बताए। बर्तमान सरकारबाट समृद्धिको अभियान सफल हुन नसक्ने भन्दै सिंहले समृद्धिको अभियान सफल बनाउने जिम्मेवारी पनि कांग्रेसकै काँधमा बताए। त्यसका लागि कांग्रेस एकठिक्का हुनुपर्ने कांग्रेसको तर्क थियो।
