हाम्रो जीवनकै शक्तिशाली हावाहुरी आयो

hawahuri
लाेकपाटी न्यूज
0 Shares

बारा, १९ चैत। नेपालको पूर्वी तराईका बारा र पर्सा जिल्लामा आइतवार साँझ आएको हावाहुरीले र्पुयाएको क्षतिको विवरण आउने क्रम जारी छ। प्रदेश नं २ का मुख्यमन्त्री मोहम्मद लालबाबु राउतले अहिलेसम्म बारामा २९ जना र पर्सामा एक जना गरी ३० जनाको ज्यान गएको बताएका छन्।

कच्ची एवम् पक्की गरी धेरै घर भत्किएका र त्यसमा मानिसहरू पुरिएको हुन सक्ने भन्दै मृतकको सङ्ख्या बढ्न सक्ने अधिकारीहरूले बताएका छन्। पीडितहरूले आफ्नो जीवनकालकै भयावह हावाहुरी देखेको बताएका छन्।
बारा फेटाकी उर्मिला सिंहले भनिन्‘ मैले भीषण हावाहुरी अन्यत्र आउने गरेको सुनेकी थिएँ, तर बाल्यकालदेखि अहिलेसम्म आफैँले यस्तो देखेकी थिइनँ। हावाहुरीसँग असिना पर्न थालेपछि मानिसहरू घरभित्र पसे। हावाहुरीले घर नै भत्काएपछि र छानाहरू उडाएपछि कहाँ जान्थे र? फसेकाहरूलाई निकाल्ने मानिस थिएनन् वर्षा र पानी रोकिएपछि बल्ल मानिसहरू उद्धारमा जुट्न थाले।

धेरै मात्रामा चामल लगायतका खानेकुरा नष्ट भएको छ। ठूला मान्छेले त भोक सहन गर्न सक्लान् तर बच्चाहरूलाई गाह्रो छ। सबैतिरबाट सहयोगको खाँचो छ। भरवलिया बाराकी ७० वर्षीय कुसुम कलु,मैले पुनर्जन्म नै पाएकी हुँ। घरभित्रबाट भाग्नलाई ढोका खोल्नासाथ छाना खस्यो। सुतिसकेको भए अथवा अलिकति ढिलो भएको भए बाँच्ने थिइनँ।
आफ्नो त खेतीबारी केही छैन। चिउरा लगायत खानेकुरा बाँडिरहेका छन्, त्यही खाएर बसेका छौँ।

फेटा बाराकी इन्दु देवी,मेरो छोरा, देवर र सासुलाई चोटपटक लागेको छ। हाम्रो दुईवटा घर भत्केको छ। रुन थाल्यौँ, राति पकाइसकेको खाना पनि कसैले खान सकेनौँ। यस्तै भरवलियाकै रामसरुफ राउतले भने,कतिपयका बच्चा फेला परिरहेका छन्। आ आफ्नो ज्यान बचाउन हम्मेहम्मे परिरहेको थियो।अरूलाई बचाउने त परको कुरा भयोे।‘‘ अचानक भुमरी परेर घरहरू भत्किन थाले। डोजर आएर बाटो खोलेको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्