लाेकपाटी न्यूजसोल,२२ चैत। दक्षिण कोरियाली सरकारले शुक्रबार राष्ट्रिय प्रकोपको घोषणा गरेको छ। देशको उत्तरपूर्वी तटीय क्षेत्रका पाँच ओटा शहरमा भीषण डढेलो लागेपछि सरकारले राष्ट्रिय प्रकोपको घोषणा गरेको हाे ।
उक्त शहरमा लागेको भीषण डढेलोमा एक व्यक्तिको मृत्यु हुनुका साथै अन्य ११ जना घाइते भएका थिए ।राष्ट्रिय राजधानी सोलबाट करिब २ सय १० किलोमिटर उत्तरपश्चिममा रहेको सीमावर्ती शहरको सडक इलाकाबाट स्थानीय समयानुसार बिहीबार राति आगलागी भएको थियो।
डढेलोबाट करिब २ सय ५० हेक्टर जमिन र १ सय २५ घर ध्वस्त भएको छ। प्रकोपका कारण हजारौँ व्यक्ति रातारात विस्थापित भएका छन्। प्रकोपपछि दक्षिण कोरियाली राष्ट्रपति मुन जाए इनले राति नै राष्ट्रिय व्यवथापन निकायसँग छलफल गरेका थिए।
उनले उपलब्ध साधन र स्रोतको अधिकतम प्रयोग गरी डढेलो नियन्त्रण गर्न निर्देशन दिएका छन्।
कडा हावा र अँध्यारोका कारण अग्नीनियन्त्रकलाई डढेलो नियन्त्रणको काममा कठिनाई उत्पन्न भएको बताइएको छ।
