लाेकपाटी न्यूजकाठमाडौं, ८ वैशाख । दीपक मनाङेको लगानी बन्न लागेको फिल्म ‘पोई पर्यो काले’को मुख्य भूमिकामा सृष्टि श्रेष्ठ र सौगात मल्ल देखिने भएका छन् ।
निर्देशक शिशिर राणाले केही दिन अगाडि फिल्मका लागि सौगातलाई अनुबन्धित गरेका थिए, भने अहिले सृष्टिलाई पनि फाइनल गरेका हुन् । फिल्ममा सौगात र सृष्टि एकअर्काका प्रेमजोडीको रुपमा देखिने छन् । फिल्ममा सौगात र सृष्टिको एक अर्काको अपोजिट भूमिकामा रहने वा नरहनेबारे निर्देशक राणाले केही खुलाउन चाहेनन् ।
जेठबाट छायांकनका लागि फ्लोरमा निस्किने फिल्मका प्रस्तुतकर्ता श्यामबहादुर थापा हुन् । फिल्ममा रघु परियार र किरण नेपाली कार्यकारी निर्माता रहेका छन् । अभिनेता सौगात पछिल्लो समय धमाधम फिल्म साइन गरिरहेका छन् ।
शिशिर राणाको फिल्म पछि उनले शुक्रबार सुवर्ण थापाको निर्देशन रहने फिल्म ‘राम राम’ पनि खेल्ने भएका छन् । सौगात सो टिमसँग शुक्रबार जोडिएका हुन् ।
