लाेकपाटी न्यूजकाठमाडौं, १० वैशाख । पटेर्वा सुगौली गाउँपालिका–१ का ३९ वर्षीय उमेश सहनीलाई अवैध लागूऔषध गाँजा करिब ७० किलो र प्रतिबन्धित जरायोको सिङ १ थानसहित सोमबार प्रहरीले पक्राउ गरेको छ ।
विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरीले सहनीको घरमा तलासी गर्दा उक्त परिमाणको गाँजा र जरायोको सिङसहित फेला पारी उनलाई पक्राउ गरेको हो ।
यसैबीच वीरगंज महानगरपालिका–१२ मुरलीबाट करिब १० किलो चरेश सोमबार साँझ प्रहरीले बरामद गरेको छ । सोही ठाउँस्थित पोखरीमा नुहाउन गएका बालबालिकाहरुले गाडिएको अवस्थामा उक्त लागूऔषध फेला पारी प्रहरीलाई खबर गरे पश्चात प्रहरीले बरामद गरेको हो ।
त्यस्तै काठमाडौंको बालाजु बस्ने नुवाकोट शिवपुरी गाउँपालिका–८ की १५ वर्षीया किशोरीलाई जबरजस्ती करणी गरेको अभियोगमा काठमाडौं स्वयम्भू घर भएका २७ वर्षीय राजु नगरकोटीलाई सोमबार दिउँसो प्रहरीले पक्राउ गरेको छ ।
किशोरीलाई चैत २२ गते ललाईफकाई स्यूचाटारस्थित कोठामा राखी जबरजस्ती करणी गरेको भन्ने खबर प्राप्त हुनासाथ महानगरीय प्रहरी वृत स्वयम्भूबाट खटिएको प्रहरीले उनलाई पक्राउ गरेको हो ।
त्यस्तै ललितपुरको गोदावारी नगरपालिका–१ गोदामचौरस्थित जग्गा भाडामा लिई टहरा बनाई बसेका सिन्धुली घर भएका ४२ वर्षीय जयबहादुर वाइवालाई आफ्नै श्रीमतीको हत्या गरेको अभियोगमा मंगलबार बिहान प्रहरीले पक्राउ गरेको छ ।
आफ्नै ४१ वर्षीया श्रीमती सुनमाया अधिकारीलाई धारिलो हतियार खुर्पाले घाँटीमा प्रहार गर्दा मृत्यु भएको खबर प्राप्त भए पश्चात महानगरीय प्रहरी प्रभाग बाँडेगाँउबाट खटिएको प्रहरीले जय बहादुरलाई पक्राउ गरेको हो । उनको मानसिक अवस्था ठीक नभएको बुझिएको छ । घटनाका सम्बन्धमा प्रहरीले थप अनुसन्धान गरिरहेको छ ।
