लाेकपाटी न्यूजकाठमाडौं, १७ वैशाख । सत्तारुढ नेपाल कम्युनिष्ट पार्टी (नेकपा) का स्थायी समिति सदस्य एवम् सांसद देवेन्द्र पौडेलले ओली सरकारले भ्रष्टचार नियन्त्रण गरिरहेको बताएका छन्।
मंगलबार राजधानीमा आयोजित एक कार्यक्रममा बोल्दै नेता पौडेलले सरकारले आफ्नो स्वामित्वमा रहेका सबै जग्गाको संरक्षण गर्ने स्पष्ट पारे । पौडेलले भने, ‘यदि कसैले सरकारी जग्गा अतिक्रमण गरेको छ भने भूमाफीया र उनीहरुको कुनै पक्ष वा अंशलाई पनि बाँकी राख्दैन । ठाडै कारबाही गर्छ ।’
उनले आजको मितिसम्म सरकारी जग्गा कसैले कब्जा गरेको प्रमाण भए वर्तमान सरकारले सबै सरकारी जग्गा बचाउ गर्ने बताए । कार्यक्रममा बोल्दै पौडेलले भने, ‘अहिले सरकारी जग्गा सबै भूमाफीयाहरुले कब्जा गरे भनेर भयानक नै भयो भने जसरी हल्ला फैलाइएको छ । यो सही होइन ।’
नेता पौडेलले नेकपाका महासचिव विष्णु पौडेलको नाम बालुवाटार जग्गा प्रकरणमा जोडेर प्रचार गर्न आवश्यक नरहेको टिप्पणी गरे । ‘उहाँले ०६१ सालमा जग्गा किन्नु भएको हो । त्यतिबेला उहाँको पार्टी शक्तिशाली पनि थिएन । सरकारमा पनि थिएन । अहिले अनावश्यक रुपमा उहाँको नाम जोडेर प्रचार भयो, जुन गलत छ । उहाँले सरकारी हैसियतमा त्यो जग्गा किनेको होईन् । तर, सार्वजनिक पद धारण गरेका व्यक्तिहरु पारदर्शी हुनुपर्छ ।’
बालुवटार जग्गा प्रकरणमा विष्णु पौडेलको संलग्नता नरहेको पनि उनले दाबी गरे । ‘यो विषयलाई लिएर नैतिकताको आधारमा उहाँले राजीनामा दिने कुरा होईन, ८ आना जग्गा किन्नुभएको हो, पौडेलले भने, ‘उहाँले सरकारी स्रोत दुरुपयोग गरेर किन्नुभएको होइन । व्यक्तिलाई जग्गा किनबेचको अधिकार छ ।’
त्यस्तै नेता पौडेलले वर्तमान सरकारले भ्रष्टाचार हुनै नदिने पनि दाबी गरे । उनले भनेका छन् ‘यदि कहिँ कतै भ्रष्टाचार गरेको प्रमाणित भयो भने अनुहार पनि नहेरी ठाडै कारबाही हुन्छ । यो कुरा आज पनि प्रधानमन्त्री केपी शर्मा ओलीले हाम्रो संसदीय दलको बैठकमा भन्नुभएको छ ।’
नेता पौडेलले भ्रष्टाचार गरेको प्रमाणित भएकाहरु कोही पनि नबच्ने पनि दाबी गरे । यद्यपी बिना प्रमाण र कारण कसैलाई पनि कारबाही नहुने उनको भनाइ थियो ।
कार्यक्रमा प्रमूख प्रतिपक्षी दल नेपाली कांग्रेसका नेता एवम् पूर्वमन्त्री मिन विश्वकर्माले भ्रष्टाचार, कुशासन, हत्या, हिंसा, बलात्कार, असंवैधानिक कदमहरु अहिले छताछुल्ल भैरहेको आरोप लगाएका छन् । उनले भने,‘त्यही भएर जनताले अहिले कांग्रेसीहरु तिमीहरु कहाँ छौं ? भनेर आक्रोश पोखिरहेका छन् ।’
मुलुक नै सञ्चालन गरेको त्यो पनि अर्थमन्त्रीको जिम्मेवारी बहन गरिसकेको व्यक्ति विष्णु पौडेलले सबै सेटिङ मिलाए बापत बालुवाटार प्रकरणमा ८ आना जग्गा बकस पाएको विश्वकर्माको आरोप छ ।
उनले भने, ‘मैले सुनेको चाहिँ उहाँले सबै सेटिङ मिलाएकोले त्यो ८ आना जग्गा बकस पाउनुभएको हो । अनि कसको नाउँमा राखौं भनेर सोध्दा उहाँले आफ्नो नाममा राख्दा नराम्रो सन्देश जान्छ र अर्काको नाममा राख्दा सुरक्षित नहुने भएकोले छोराको नाममा राख्नुभएको हो अरे ।’
ललिता निवासलाई मोही कायम गर्न लाखौं÷करोडौं खर्चिएका भूमाफीयाहरुले विष्णु पौडेलको कारण आफूहरु फसेको गुनासो गरेको पनि उनले स्पष्ट पारे । विश्वकर्माले वर्तमान प्रधानमन्त्री केपी शर्मा ओलीले खान्न भन्दा भन्दै बालुवाटार, खुल्लामञ्चलगायत सबै खान थालेको अर्को गम्भिर आरोप लगाए । उनले भने, ‘दुर्वशा ऋषिले खान्न भन्दा भन्दै लड्डु खाएजस्तै ओलीजी पनि सबै खानुभयो ।’
नैतिकताको आधारमा पनि विष्णु पौडेलले यो प्रकरणमा राजीनामा दिनुपर्ने उनको भनाइ छ । उनले भने, ‘सरकारी जग्गा हडप्न किर्ते गर्नेहरु, गैरकानूनी ढंगले सरकारी जग्गाहरु कब्जा गर्ने सबैजना दण्ड, सजायको भागीदार हुनुपर्छ ।’ समाजको रोल मोडल भएकोले विष्णु पौडेललाई यो प्रकरणमा दोब्बर, तेब्बर र विशिष्ट ढंगको सजाय गर्नुपर्ने पनि विश्वकर्माले माग गरे ।
उक्त ललिता निवासको जग्गा प्रकरणमा वर्तमान सरकारले हिजोबाट एक्कासी आफ्नो तातो खरानी प्रतिपक्षी दलतर्फ फालेको पनि उनले आरोप लगाए । उनले भने, ‘यसभन्दा अघिपनि ३३ केजी सुन तस्करी प्रकरणमा अनुहार हेर्दा आफ्नै मान्छे परेपछि ओलीजीले बाजेको सेकुवा बन्द गराउनुभयो । यो सरकार अपराधीकरणलाई संरक्षण गर्नेतर्फ लागेको छ।’
उनले यो जग्गा प्रकरणमा यदि कृष्णप्रसाद भट्टराईपनि दोषी भए मरणोपरान्त दण्ड, सजाय गर्नुपर्ने बताए । उनले भने, ‘किसुनजी, गिरिजा प्रसाद कोइराला, मनमोहन अधिकारी वा शेरबहादुर देउवा जो हुन्, सबैको बारेमा गहिरो छानबिन गरियोस् ।’
आफ्नो पार्टीका सभापति एवम् संसदीय दलका नेता देउवाले वार्डडबडी काण्डमा पनि ठूलो दृढ विश्वासका साथ उक्त प्रकरणमा संलग्नलाई कारबाही होस भनेर आवाज उठाउँदा उनीमाथि नै हिलो छ्याप्ने काम भएको विश्वकर्माले स्मरण गराए । उनले भने,‘अहिलेपनि सरकारले आनन्दको महशुस गर्नको लागि षड्यन्त्र र कुचेष्टा गरेको छ । देउवामाथि जसले आरोप लगाएका छन्, यसभन्दा अघिका आरोपितहरुले एकछिन सास फेर्ने कुचेष्टा मात्रै गरेका हुन् ।’
