लाेकपाटी न्यूजकाठमाडौँ। ब्राजिलका लिजेण्ड फुटबलर रोनाल्डोले बार्सिलोनाको हारको दोष लियोनेल मेस्सीलाई पनि दिनुपर्ने बताएका छन्। रोनाल्डोले मेसीलाई बार्सिलोनाको सफलताको जति श्रेय दिइन्छ, त्यति नै हारको पनि दोष दिनुपर्ने प्रतिक्रिया दिएका छन्।
च्याम्पियन्स लिगको सेमिफाइनलमा लिभरपुलसँग पराजित भएर बाहिरिएपछि रोनाल्डोको यस्तो प्रतिक्रिया बाहिर आएको हो। पहिलो लिगमा मेसीको २ गोलको मद्धतले लिभरपुलविरुद्ध ३–० गोल अन्तरको जित निकालेको बार्सिलोना दोस्रो लिगमा ४–० ले पराजित भएपछि सेमिफाइनलबाट बाहिरिएको थियो।
धेरैजसो मिडिया रिपोर्टमा ब्राजिलका फिलिप कोटिन्हो र प्रशिक्षक इर्नेष्टो भालभर्डेलाई बार्सिलोनाको हारको दोष दिइरहेका बेला रोनाल्डोले मेसीलाई हारको दोषी नदेख्नु ‘अनफेयर’ हुने बताएका छन्। उनले मेस्सीले हारको जिम्मा लिने पनि बताएका छन्।
उनले भने, ‘मैले मिडियामा देखेको छु बार्सिलोना ठूलो क्लब हो, बार्सिलोनामा उत्कृष्ट खेलाडी छन्, जो मेस्सी हुन्, अर्को दिन फेरि मिडियामा देखिन्छ, बार्सिलोनाले मेस्सीले गर्दा खेल जित्यो, अन्य खेलाडीले हारे। यो सरसर अन्य खेलाडी र कोचिङ स्टाफका लागि नराम्रो कुरा हो, यस्तो हुनु हुँदैन।’
रोनाल्डोले हारको दोष कुनै एक खेलाडीलाई दिनुभन्दा पुरै टिमले लिनुपर्ने बताएका छन्। लिभरपुलले उत्कृष्ट फुटबल खेलेको भए पनि खेलको पहिलो हाफमा बार्सिलोनाले गोल गर्ने अवसर गुमाएको रोनाल्डोले बताएका छन्।
ब्राजिलका महान् खेलाडी रोनाल्डो बार्सिलोनामा सन् १९९६–९७ का चर्चित फुटबलर हुन्। त्यस अवधिमा रोनाल्डोले ४९ खेल खेल्दै ३४ गोल गरेका थिए। त्यस बेला बार्सिलोनाका लागि युइएफए कप, कोपा डेल रे र सुपर कोपाको उपाधि जितेका थिए।
