लाेकपाटी न्यूजकाठमाडौं, ३ जेठ। काठमाडौंको माछापोखरी बाइपासस्थित विभिन्न होटेल, रेष्टुरेण्ट र सडक किनारबाट अनैतिक क्रियाकलापमा संलग्न ६१ जना पक्राउ परेका छन्।
बुधबार साँझ प्रहरीले विभिन्न होटेल, रेष्टुरेण्ट र सडक किनारबाट अनैतिक क्रियाकलापमा संलग्न ४४ पुरुष र १७ महिला गरी ६१ जनालाई पक्राउ गरेको हो। महानगरीय प्रहरी वृत्त बालाजुबाट खटिएको प्रहरीले स्विप अप्रेसन गर्ने क्रममा उनीहरूलाई पक्राउ गरेको हो।
पक्राउ परेकामध्ये अनुसन्धानपश्चात् १५ पुरुष र ६ महिला गरी २१ जनालाई आफन्तको जिम्मा लगाइएको छ।अन्य ४० जनाको सम्बन्धमा थप अनुसन्धान कार्य भइरहेको छ।
यस्तै काठमाडौं महानगरपालिका २ निल सरस्वतीस्थित भेकल ग्यारेजमा जुवातास खेलिरहेको अवस्थामा नुवाकोट घर भएका २४ वर्षीय हरिबोल सरौला समेत ३ जनालाई प्रहरीले पक्राउ गरेको छ। उनीहरुबाट १ बुक तास र नगद ८ हजार ३ सय २० रुपैयाँसहित बुधबार साँझ प्रहरीले पक्राउ गरेको हो।
