आज महाष्टमी, बलि दिने दिन

लाेकपाटी न्यूज
0 Shares

काठमाडौं। नवरात्रिको आज आठौं दिन विशेष पूजा तथा आराधना गरिन्छ। विशेष गरी महाकाली–भद्रकालीको पूजा–आजा गरिन्छ। यस दिन महागौरीको पूजा आराधना गरेमा सन्तान सुख मिल्ने कुरा शास्त्रमा उल्लेख गरिएको छ।

महागौरी भगवतीलाई नरिवल अर्पण गरेमा सम्पूर्ण सुख शान्ति प्राप्ति हुने कुरा पनि बताइएको छ। देवीभागवत् अनुसार प्राचीन कालमा दक्षप्रजापतिको यज्ञ नाश गर्ने ज्यादै शक्तिशाली भद्रकाली (करोडौं योनी–शक्ति)का साथ अष्टमीका दिन उत्पन्न भएको पूजा गर्ने चलन छ। पूजापश्चात् यी देवीलाई बोका, कुखुरा, हाँस, राँगो आदि बलि दिइन्छ।

‘मांसाशनं ये कुर्वन्ति तैः कार्यं पशुहिंसंनम् महिषा जवराहाणां वलिर्दानं विशिष्यते।। देवीभागवत नवरात्रप्रकरण)’ यी दिनहरूमा मानिसहरू आ–आफ्ना कुलदेवी, देवता र स्थानीय देवीदेवतालाई पूजी बलि दिन्छन्। शाकाहारीहरूले नरिवल, कुभिण्डो, केरा, घिरौँला, आदि फल अर्पण गर्दछन्।

काठमाडौंको तलेजु भवानीको मन्दिर पनि यस दिन सर्वसाधारणको लागि खुल्ला रहन्छ। यसै दिन दशैंघर (हनुमानढोका)को मूल चोकमा तलेजु भवानीलाई राँगा र बोकाको बलि अर्पण गरिन्छ। देवी देवताहरूलाई अर्पण गरेको मांसभक्षण गर्नुलाई दोषी मानिन्न। ‘अभ्यर्च्य पितृदेवानां खादन्मांसं न दोषभाक्।। (मनुस्मृति)’ महाअष्टमी र महानवमी बिचको रातलाई कालरात्रि मानेर रातभरि गुप्तपूजा गरिन्छ।

धेरैले यसै दिनदेखि खेतीमा प्रयोग हुने हतियारको पूजा गर्छन् र दशमीमा विसर्जन गर्छन्। वैदिककाल साधना, सिद्धि, सामथ्र्य, शक्ति र सौर्यताको संगम हो। वेदमा आयुधको बारेमा प्रशस्त चर्चाहरू पाइन्छन्। भगवान् शिवको हातमा रहेको त्रिशुल, बज्र आयुध नै हुन्।

अहिंसाको सन्दर्भमा जति व्याख्या भएको छ, त्योभन्दा धेरै आयुधको चर्चा र युद्धले पनि स्थान पाएको छ। हामी खस जाति देवताको पूजा गर्दा आयुधको पूजा गर्छांै। हिमालका देवता शिवजी, रुद्र सबै आयुधधारी नै छन्। नवदुर्गा भगवतीका १८ वटै हातहरूमा आयुध (हतियार) हरू छन्।

भगवतीको सम्मानस्वरूप आयुध पूजा गर्नु शास्त्रसम्मत नै छ। हिन्दू धर्मावलम्बीहरू अहिंसावादी हुन् तर वैरीले जब राष्ट्र, समाज, संस्कृति सिद्धयाउन आँटे भने हतियारको पूजा मात्र नभएर उठाउन पनि तयार छन्। त्यस्तै देशका विभिन्न दुर्गा मन्दिरहरूमा धुमधाम पूजाआजाका साथै राङ्गा, बोकाको बलि पनि दिइन्छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्