‘सीमा सुरक्षाको लागि कुनै सम्झौता गर्दैनौं’

som pandey
लाेकपाटी न्यूज

काठमाडौं, १ मंसिर । नेपाल कम्युनिष्ट पार्टी (नेकपा) का स्थायी समिति सदस्य तथा सांसद सोमप्रसाद पाण्डेले सरकारले भारत सरकारसँग सीमा विवाद समाधानको लागि तत्काल वार्ता तथा छलफल अघि बढाउने तयारी गरेको स्पष्ट पारेका छन्।  उनले भने,‘वर्तमान सरकारले एक ईञ्च पनि जमिन गुम्न दिँदैन।

सरकार सीमा सुरक्षाको लागि पूर्ण प्रतिबद्ध छ। हामी सीमा सुरक्षाको लागि कुनै सम्झौता गर्दैनौं। हामी कुटनीतिक रुपमा समस्याको समाधान गर्छौं । मैले थाहा पाएअनुसार सरकारले छिट्टै भारतसँग वार्ताको लागि पहल गर्दैछ।’ आइतबार रिपोर्टर्स क्लब नेपालले आयोजना गरेको साक्षात्कारमा बोल्दै नेता पाण्डेले सुगौली सन्धिमा नै भारतसँगको सीमाको बारेमा सबै कुरा टुँगो लगाईसकेको बताए। उनले भने, ‘सुगौली सन्धिमै स्पष्ट नक्शा छ। त्यसले काम गर्छ । कालापानी र लिपुलेक अहिले चासो र संवेदनशील विषय हो, यो सबैको मनमनमा भिजेको छ । यो आजको विषय होईन् । लिपुलेकबाट भारतीय सेना हटाउनुपर्छ ।

कालापानी नेपालकै भू-भाग हो । यो कुरा सुगौली सन्धिमै उल्लेख गरिएको छ । यसमा कुनै द्धिविधा छैन् । काली नदी यताका टिंकर, कालापानी, लिपुलेक नेपालकै हो ।’ साक्षात्कारमा बोल्दै उनले भारतीय सेनाले तत्काल उक्त नेपाली भू-भाग छोड्न्पर्ने बताए। उनले भने, ‘यो विवाद अब टुँगो लगाउनुपर्छ।

भारतीय सेना त्यहाँबाट फिर्ता हुनुपर्छ भनेर आज प्रधानमन्त्रीज्यूले पनि बोलिसक्नुभएको छ । कुटनीतिक माध्यमबाट छलफलको ढोका खोलिनुपर्छ। सरकारले सबै तयारी गरिसकेको छ।’  फरक प्रसँगमा उनले विप्लवसँगपनि सरकारले वार्ताको लागि पहल गरिरहेको बताए । उनले भने,‘विप्लव नेकपासँग हामी सामान्य सम्पर्कमा छौं । सरकार वार्ता गर्न तयार छ । तर, वार्ताको मोडालिटी के हुने हो त्यो छलफलको विषय छ । तर, वार्ताको विकल्प छैन् । विप्लव समूह शान्तिपूर्ण राजनीतिमा आओस् ।’