लाेकपाटी न्यूजएजेन्सी। रुसी राष्ट्रपति भ्लादिमिर पुटिनले अमेरिकी राष्ट्रपति डोनाल्ड ट्रम्पलाई धन्यवाद दिएका छन्। रुसमा गरिन लागेको आतंककारी कार्य रोक्न गुप्तचरी सूचना उपलब्ध गराएको भन्दै पुटिनले धन्यवाद दिएको क्रेमलिनले जनाएको छ।
क्रेम्लिनले विज्ञप्ति निकाली दुई राष्ट्रपतिबीच आइतवार फोनवार्ता भएको जनाएको छ। अमेरिकी गुप्तचर निकायबाट सूचना पाएको जनाए पनि त्यसबारे अरु विवरण सार्वजनिक गरिएको छैन।
नववर्षका बेला सेन्ट पिटर्स्बर्गमा गरिन लागेको आतंककारी आक्रमणको योजना पत्ता लागेको रुसी सञ्चारमाध्यमहरुले जनाएको बीबीसीले उल्लेख गरेको छ। रुसी गुप्तचर निकाय एफएसबीका एक प्रवक्तालाई उधृत गर्दै समाचार संस्था टासले मानिस भेला हुने स्थानमा आक्रमण गर्ने योजनासम्बन्धी सामग्री बरामद भएको जनाएको छ।
यसअघि सन् २०१७ को डिसेम्बरमा पनि पुटिनले अमेरिकी गुप्तचर निकायले सूचना उपलब्ध गराएको भन्दै ट्रम्पलाई धन्यवाद दिएका थिए। त्यसबेला पनि सेन्ट पिटर्स्बर्गमा हुन सक्ने सम्भावित आतंककारी आक्रमणबारे कै सूचना दिइएको थियो।
सन् २०१६ मा भएको अमेरिकी निर्वाचनमा क्रेमलिनले हस्तक्षेप गरी ट्रम्पलाई जिताउन भूमिका खेलेको आरोप विपक्षी डेमोक्रेट्सले लगाइरहेका बेला ट्रम्प र पुटिनबीचको सम्बन्ध प्रतिआतंकवादमा सहकार्य तहमा देखिएको हो। उनीहरूबीच आतंकवाद नियन्त्रण गर्न परस्पर सहयोग गर्ने समझदारी पनि बनेको थियो।
