लाेकपाटी न्यूजकाठमाडौं। केही मानिसमा भने सपिङको लत नै हुन्छ। यस्तो लतमा महिलाहरु अझैं बढी हुन्छन्। सपिङको लतले तपाइँको पैसाको मात्रै होइन् समयको पनि खर्च भइरहेको हुन्छ।
साथै घरमा अनावश्यक सामानहरुले पनि अस्तव्यस्त बनाउँछ। कसरी हटाउने त सपिङको लत ? यी उपायहरु अपनाउनुहोस् केही परिर्वतन पक्कै आउनेछ।
- अरुको नक्कल नगर्नुहोस्
सपिङ गर्ने मूख्य लत भनेको अरुको नक्कल गर्ने कारणले पनि हुने गर्दछ। यदि तपाईं कसैकोमा जानु भयो। त्यहाँ केही सामाग्री देख्नु भयो भने त्यो वस्तु किन्ने वा घर भित्र्याउने चाहना हुन जान्छ। यस्तोमा अरुको नक्कल गर्ने नाममा सपिङ गर्ने काम बन्द गर्नुपर्छ।
- खर्चको हिसाब किताब गर्ने
सपिङ गर्ने लत छुटाउनका लागि सबैभन्दा राम्रो विकल्प भनेको खर्चको हिसाब किताब गर्नु हो। खर्च गरेको रकम सबै लेखेर राख्नाले कति धन सपिङमा आफूले नाश गरिरहेको छु भन्ने जानकारी पाइन्छ।
- आवश्यकता पहिचान गर्ने
बजारमा सपिङ गर्न जाँदा आफूलाई घरमा के वस्तु चाहिएको हो त्यो वस्तुको मात्र खोजी गर्ने। साथै, आवश्यकता भएकाभन्दा बाहिरको सामान जति नै सस्तो वा सुलभ भए पनि काम लाग्छ भनेर नकिन्ने।
- कम उपभोग गर्ने
घरमा भएका सामाग्रीको सकेसम्म कम उपयोग गर्ने बानी बसाउनु पर्छ। आवश्यकताभन्दा बढी मात्रामा कुनै पनि वस्तुको प्रयोग गर्दा त्यो चाँडै सकिन्छ र पुनः त्यसको आवश्यकता हुन्छ। त्यसैले कुनै पनि वस्तुको प्रयोग गर्दा चाहिने जति मात्र लिनुपर्छ।
- अन्तिमसम्म उपभोग गर्ने
विशेषत धेरै मानिसमा कुनै सामाग्री पूर्ण रुपमा नसकी अर्को किन्ने बानी हुन्छ। यस्तोमा घरमा अलिकति बाकी छँदै बजारमा अर्को किनिन्छ र घरमा भएको सामाग्री फ्याकिने सम्भावना उच्च हुन्छ।
- पुनः प्रयोग गर्ने
कतिपय सामाग्री पुनः प्रयोग गर्न मिल्ने हुन्छन्। तर हामी त्यसलाई एक पटक वा दुई पटक प्रयोग भएपछि फ्याक्ने गर्दछौँ। जबकी त्यसको पुनः प्रयोग गर्न सकेको खण्डमा बजारमा सपिङ गर्ने लतमा कमी आउँछ।
- मन भुलाउन अरु काम
केही मानिस मन भुलाउन वा फ्रेस हुन बजार जाने गर्दछन्। तर फ्रेस हुनका लागि बजार जानु र सपिङ गर्नु मात्र विकल्प होइन। पुस्तक पढ्नु, पार्क घुम्नु, आफन्तकोमा जानु वा घरमा रहनु पनि मन भुलाउने उपाय हुन्।
