लाेकपाटी न्यूजकाठमाडौं, १५ पुस। नेपाली बजारमा सुनको मूल्यमा १३ हजार आठ सय रुपियाँले मूल्य वृद्धि भएको छ। एक वर्षमा करिव १३ हजार आठ सय रुपियाँले मूल्य वृद्धि भएको हो।मंगलबार नेपाली बजारमा छापावाल सुनको मूल्य प्रतितोला ७३ हजार ५ सय रुपियाँमा कारोबार भएको छ।
त्यस्तै, तेजाबी सुनको मूल्य प्रतितोला ७३ हजार २ सय रुपियाँ पुगेको छ। अघिल्लो वर्ष २०७५ पुस १४ गते सुनको मूल्य प्रतितोला ५९ हजार पाँच सय रुपियाँ थियो। पुस महिनामा यसको अधिकतम मूल्य ६० हजार सात सय रुपियाँ कायम भएको थियो। गत असोजमा सुनको मूल्य बढेर ७३ हजार पाँच सय रुपियाँसम्म पुगेको थियो।
नेपाल सुनचाँदी व्यवसायी महासङ्घका पूर्वअध्यक्ष तेजरत्न शाक्य भन्छन्, ‘अबको केही दिनमा नयाँ रेकर्ड बनाउने सङ्केत देखापरेको छ।’ सुनको मूल्य आश्चर्यजनक रूपमा वृद्धि हुनेमा आन्तरिक कारण मात्र चाँहि होइन। अन्तर्रा्ष्ट्रिय बजारमा नै सुनको मूल्यमा वृद्धि भएको छ। अघिल्लो वर्ष यसै अवधिमा यसको मूल्य प्रतिऔँस करिब एक हजार दुई सय अमेरिकी डलर कायम भएको थियो।
सुनसँगै नेपाली बजारमा डलरको मूल्यमा भएको वृद्धिका कारण पनि नेपालमा अधिक मूल्य वृद्धि हुन पुगेको हो। नेपाली बजारमा अमेरिकी डलर ११४.४८ रुपियाँमा बिक्री भएको छ। त्यसका साथै एक नेपाली सुनको भन्सार दर पनि बढेको छ। अघिल्लो वर्ष प्रति १० ग्राम चार हजार दुई सय रुपियाँ भन्सार दर कायम गरिएकोमा चालू आवमा दुई पटकसम्म भन्सार दर बढाइएको छ। नयाँ आर्थिक वर्ष शुरु हुँदा पाँच हजार रुपियाँ भन्सार दर तोकिएको थियो। त्यसपछि गत असोजमा पुनः बढाएर छ हजार पाँच सय रुपियाँ र्पुयाइएको छ।
विवाहलगायतका अन्य शुभकार्यका लागि अफ सिजन भएका कारण नेपाली बजारमा सुनको किनबेच शून्यजस्तै भएको पूर्वअध्यक्ष शाक्य बताउँछन्। पुसको अन्तिम सातापछि भने बजारमा केही चहलपहल देखिएला भन्ने आशा छ।
