लाेकपाटी न्यूजकाठमाडौं। ‘म यस्तो गीत गाउँछु २’ को दोस्रो गीत सार्वजनिक भएको छ। सुदर्शन थापा निर्देशित फिल्म ‘म यस्तो गीत गाउँछु २’ को दोस्रो गीत ‘दुःखको काँडा’ आज सार्वजनिक भएको हो। संगीतकार अर्जुन पोखरेलको संगीत रहेको गीतमा देवल भण्डारीको शब्द र सनिष श्रेष्ठको स्वर छ।
यो गीतले प्रेमीले प्रेमिकाप्रति देखाएको मायाको आशक्तीलाई देखाएको छ। यो गीतको अडियो पावरफूल छ। यस्तै, गीत अनुसार भिडियोलाई पनि बलियो बनाइएको छ। गीतको कोरियोग्राफी पनि उत्कृष्ट छ। गीतको भिडियोमा अभिनेता पल शाह र अभिनेत्री पूजा शर्मा फिचर्ड छन्।
पल र पूजाको केमेस्ट्री पनि सुहाएको देखिन्छ। रामजी लामिछानेको कोरियोग्राफी रहेको यो गीतको भिडियोलाई सौरभ लामाले खिचेका हुन्। गीतको भिडियोलाई आकर्षक बनाउन निर्माण टिमले ठूलो रकम खर्च गरेर काठमाडौंको त्रिपुरेश्वरमा कृतिम हिउँ नै पारेको छ। यस फिल्मको पहिलो गीत ‘तिम्रो घरको वरिपरि’ बोलको गीत पनि यति बेला चर्चामा छ।
फागुन २३ गतेबाट प्रदर्शनमा आउने ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ। शिवम अधिकारी र दिनेश न्यौपानेले फिल्मको कथा लेखेका हुन्। पूजा र सुदर्शन फिल्मका निर्माता हुन्।
