लाेकपाटी न्यूजजनकपुर। प्रहरीले चाइनिज पेस्तोलसहित २ जनालाई जनकपुरधाममा नियन्त्रणमा लिएको छ। धनुषाको क्षिरेश्वरनाथ नगरपालिका–१ रमदैयाका ४० वर्षीय जितेन्द्र यादव र सोही नगरपालिका–५ का ३० वर्षीय कुमोद नारायण झालाई हतियारसहित पक्राउ गरिएको प्रहरी नायब उपरीक्षक रामेश्वर कार्कीले जानकारी दिए।
नियन्त्रणमा लिएका दुवै जनालाई शनिबार राती जनकपुरधामको भानुचोकबाट नियन्त्रणमा लिएको बताइएको छ। बा १४ च ७४५९ नम्बरको महिन्द्रा टीयुभी गाडी र ज ९ प ४९०६ नम्बरको बाइक एक आपसमा ठोकिदा तत्काल प्रहरीले चारपांग्रे गाडी र बाइकलाई नियन्त्रणमा लिएर रेल्वे प्रहरी चौकीमा अनुसन्धान थालेको थियो।
प्रहरीले दुर्घटनाको विषयमा अनुसन्धान गर्दा महिन्द्रा टीयुभी गाडीभित्रको डिक्कीमा हतियार भेटाएको थियो। प्रहरीले खोजतलास गर्दा ६ राउण्ड गोलीसहित चाइनिज पेस्तोल समेत बरामद भएको प्रहरी नायब उपरीक्षक कार्कीले बताए। घटनाका सम्बन्धमा थप अनुसन्धान भइरहेको छ।
