लाेकपाटी न्यूजकाठमाडौं, ८ माघ। नेपाली कांग्रेसका सभापति शेरबहादुर देउवाले शीर्ष नेताहरुलाई आफ्नो निवास बुढानिलकण्ठमा बोलाएका छन्। पार्टीभित्र देखिएको विवाद समाधानका लागि नेपाली कांग्रेसका सभापति शेरबहादुर देउवाले शीर्ष नेताहरुलाई बोलाएका हुन्।
पार्टी सभापति शेरबहादुर देउवा निवास बुढानिलकण्ठमा दिउँसो ३ बजे बैठक बस्न लागेको उपसभापति विमलेन्द्र निधिले जानकारी दिए। बैठकमा वरिष्ठ नेता रामचन्द्र पौडेल, महामन्त्री पूर्णबहादुर खड्का, पूर्व महामन्त्रीद्वय कृष्ण सिटौला र प्रकाशमान सिंहलाई बोलाइएको छ।
पुस ११ गते संस्थापन पक्षले केन्द्रीय कार्यसमिति बैठकबाट महाधिवेशनको मिति, विभागहरुको संख्या थप लगायतका निर्णय गरेपछि नेता पौडेल–सिटौला पक्ष असन्तुष्ट बनेको छ। पार्टी भित्र विवाद बढ्दै जाँदा असन्तुष्ट पक्षले आफू पक्षधर जिल्ला सभापतिहरुलाई काठमाडौंमा भेला गरि संस्थापन पक्षलाई दवावसमेत दिएको थियो। सभापति देउवाले असन्तुष्ट पक्षको माग सम्बोधन गर्न आफू तयार रहेको बताएका थिए।
