लाेकपाटी न्यूजसुर्खेत, ११ माघ। गृहमन्त्री रामबहादुर थापा (बादल) ले एमसीसीमा भएका प्रावधान संशोधन हुनुपर्ने बताएका छन्।देशको स्वाधिनता र स्वतन्त्रतालाई कुण्ठित पारेर एमसीसी सम्झौता नहुने उनले बताए। दुईदिने सुरक्षा गोष्टिमा सहभागी हुन सुर्खेत पुगेका मन्त्री थापाले यस्तो बताएका हुन्।
‘एमसीसी परियोजनाअन्तर्गत अमेरिकाबाट नेपालमा लगानी हुने ५५ अर्ब बजेटमा नेपालको पनि १३ अर्ब लगानी हुन्छ’, उनले भने, ‘तर पनि कर्मचारी राख्नेदेखि लेखापरीक्षणलगायत विभिन्न प्रावधानहरुमा अमेरिकाको निर्णय मान्नुपर्ने बाध्यता जस्ता कुराहरु संशोधन हुनुपर्छ।’
अमेरिकी राजदूतावासले एमसीसी हिन्द प्रशान्त रणनीति नरहेको विज्ञप्तिमार्फत् जानकारी गराइसकेको बताए।
गृहमन्त्री थापाले एमसीसीबारे नेकपाको स्थायी समितिमा छलफल भएर हिन्द प्रशान्त रणनीति एमसिसीमा समेटिए सो सम्झौतामा सहभागी नहुने र त्यसको कार्यान्वयन नगर्ने भन्ने भएको जानकारी दिए।
अन्तर्राष्ट्रिय कूटनीतिक सम्बन्ध सुदृढ हुँदै गएको बताउँदै उनले सङ्घीयता कार्यान्वयन गर्न केही कानून बन्न बाँकी रहेको बताए। गृहमन्त्री थापाले चीनले पनि नेपालको पूर्वाधार, जलविद्युत राजमार्ग, सञ्चारलगायत क्षेत्रमा लगानी गर्न बिआरआईमार्फत् ६० अर्ब बजेट लगानी गर्ने भएको उल्लेख गर्दै लिम्पियाधुराको समस्या समाधान गर्नका लागि सरकारको भारतसँग कूटनीतिक प्रयास भइरहेको बताए।
