नेपालमा कोरोना भाइरस छैन, ढुक्कसँग भ्रमण गर्नुस्

  • 103
    Shares
0

चितवन, २४ माघ। चीनमा नोबेल कोरोना भाइरस देखिएपछि पर्यटकीय क्षेत्र सौराहामा पर्यटकको आगमनमा निकै कमी आएको छ। विदेशी पर्यटकमध्ये आधाभन्दा बढी चीनका पर्यटक यहाँ आउने गर्दछन्।

क्षेत्रीय होटल सङ्घ सौराहाका अध्यक्ष दीपक भट्टराईले सौराहा पूर्णरुपमा सुरक्षित भएको सन्देश स्वदेश र विदेशमा पु¥याउन आवश्यक देखिएको बर्ताका छन्। नेपाल नै कोरोना भाइरसबाट सुरक्षित भएको भन्दै उनले चीनको रोग देखिएका शहरबाट पर्यटक यहाँ नआएकाले यस क्षेत्र पूर्णरूपमा सुरक्षित रहेको जानकारी दिए। उनले भने, चीनबाट पर्यटक नआउने र अन्यत्रबाट पनि पर्यटक आएनन् भने यहाँको व्यवसाय धराशायी हुन्छ।

चीनको भाइरस देखिएका क्षेत्रबाट पर्यटक नेपाल आएका छैनन्। सौराहा क्षेत्रमा पहिले आएका र नेपाल बसोबास गर्दै आएका चिनियाँबाहेकका पर्यटक छैनन्। गएको वर्ष यो समयमा दैनिक सात सय हाराहारी चिनियाँ पर्यटक आउने गर्दथे। यतिबेला चितवनमा फाट्टफुट्ट मात्र चिनियाँ पर्यटक रहेका छन्।

स्वदेशी, भारतीय र युरोपियन गरी दैनिक दुई सय ५० देखि चार सय पर्यटकले अहिले सौराहा धानेको उनको भनाइ छ । सङ्घका निवर्तमान अध्यक्ष सुमन घिमिरेले समयमै हामी सुरक्षित छौँ भन्ने सन्देश स्वदेश र विदेशमा प्रवाह गर्न सकेमा चिनियाँ पर्यटक कम भए पनि अन्य पर्यटकले धान्न सक्ने बताए। सौराहा आउने पर्यटकका लागि यो मौसम निकै राम्रो मानिन्छ। वनभित्र बाघ, गैँडाजस्ता जनावरसँगै चराचुरुङ्गी अवलोकनका लागि उपयुक्त समय भएको भन्दै घिमिरेले मौसमका हिसाबले पनि चितवन यतिबेला राम्रो रहेको बताए।

यहाँ गर्मी पनि छैन र जाडो पनि हट्दै गएको छ। चिनियाँ पर्यटकको बुकिङ रद्द भएका छन्। कोरोना भाइरसको त्रासले अन्य देशका पर्यटकले पनि यहाँको अवस्थाका बारेमा बुझेर मात्र आउने गरेका छन्। कतिपयले भ्रमण रद्दसमेत गर्ने गरेका छन्। नेपाल सुरक्षित छ भन्ने सन्देश प्रवाह गर्न सकेमा विदेशी पर्यटकको भ्रमण तालिका रद्द नहुने र सङ्ख्या बढ्न सक्ने अनुमान गरिएको छ।

सौराहा आउने विदेशी पर्यटक अन्तर्राष्ट्रिय विमानस्थल र भरतपुर विमानस्थलको स्वास्थ्य कक्षमा परीक्षण गरेर मात्र पुग्ने भएकाले सुरक्षित भएकाहरु मात्र पुग्ने गरेका छन्। यससँगै सबै होटलमा उच्च सतर्कता अपनाइएको र कुनै कोरोना भाइरसको लक्षण देखापरेमा तत्काल भरतपुर अस्पतालसँग समन्वय गरेर उपचार गर्ने व्यवस्थासमेत गरिएको छ। सौराहा क्षेत्रमा ६ हजार पर्यटक धान्न सक्ने एक सय १५ होटल छन्। रासस

Comments
Loading...
You might also like