लोकपाटी न्यूजकाठमाडौं, १६ कार्तिक। कर्णाली प्रदेशका मुख्यमन्त्री महेन्द्रबहादुर शाही मन्त्रिमण्डल हेरफेरको लागि आन्तरिक तयारीमा लागेका छन्। मुख्यमन्त्री शाहीको सचिवालयले केही मन्त्रीलाई हटाएर मन्त्रीमण्डल हेरफेर गर्न लागेको जनाएको छ।
स्रोतका अनुसार केपी शर्मा ओली पक्षका मन्त्रीलाई हटाएर माधव नेपाल पक्षीय नेतालाई मन्त्री बनाउन मुख्यमन्त्री शाही लागेका छन्। हट्ने मन्त्रीमा ओली पक्षका सामाजिक विकास मन्त्री दल रावल र उद्योग, पर्यटन तथा वन, वातावरणमन्त्री नन्दसिंह बुढाको नाम चर्चामा आएको छ भने नयाँ बन्ने मन्त्रीहरुमा चन्द्रबहादुर शाही, करबिर शाही र अमरबहादुर थापाको नाम आएको छ। तर मन्त्रालयको जिम्मेवारी भने टुंगिन बाँकी रहेको जनाइएको छ।
उता मुख्यमन्त्री शाहीले हटाउने पूर्वसूचना पाएपछि सामाजिक विकास मन्त्री दल रावलले अघोषित रुपमा पद त्यागेको जानकारी सामाजिक सन्जालमार्फत् दिएका छन्। उनले फेसबुकमा लेखेका छन्, ‘कर्णाली प्रदेश सरकारको सामाजिक विकास मन्त्रीको हैसियतले ३२ महिनाको अवधिमा मन्त्रालयलाई नवजात अवस्थाबाट शिशु अवस्थामा पुर्याउन प्रत्यक्ष वा परोक्ष रूपमा सहयोग गर्नुहुने समआदरणीय महानुभावहरुप्रति ऋणी छु।’
ओली पक्षका नेता यामलाल कंडेलले मुख्यमन्त्री शाहीविरुद्ध अविश्वासको प्रस्ताव दर्ता गरेपछि कर्णाली प्रदेशमा नेकपाभित्र विवाद सुरु भएको थियो ।
