मलाई सुलेमानी नबनाइयोस् महाराज !

Shailendra Ghimire
शैलेन्द्र घिमिरे

रहमान गज्जवको योद्धा थियो ! उसको तरवार बिजुलिको गतिमा चल्थ्यो र जोसुकै पनि उसको तरवारसँग काँप्थे ! एक दिन समुन्द्री किनारको आकस्मिक लडाईमा उ पराजित भयो। उसका हातखुट्टामा सिक्री बाँधियो र मरुभूमिमा लडाईयो। बिजेता देशको राजा चाहन्थे उ दास बनोस, अब्बल दास ! जो आफैलाई विर्साेस र मात्र मालिकको आदेशको तामेल गरोस्।

यसका लागि रहमानमाथि गज्जबको तरिका अपनाईयो। अगाडिका सबै कुरा बिर्साउनका लागि रहमानलाई हात खुट्टा बाँधेर मरुभूमिको चर्काे घाममा लडाईयो। उसको कपाल मुण्डन गरियो र आलो सुत्केरी उँटको कल्चौडो काटेर ल्याईयो। सुत्केरी उटको कल्चौडोको छाला बेस्सरी तन्काएर रहमानको टाउकोमा टाँस्सियो अनि फेरि घाममा लडाईयो।

टाउकोमा टास्सिएको उटको छाला बिस्तारै सुक्न थाल्यो। छाला जति सुक्थ्यो पीडा उति नै थपिन्थ्यो। छालाले टाउको कस्तै लग्यो र त्यो टाउको अठ्याउने एक भड्डु जस्तै बन्यो। समयसंगै टाउकोका रौहरु बढन थाले। तर तिनिहरु बाहिरिने ठाउँ थिएन त्यस कारण रौहरु पलाएकै दिशातर्फ नै सोझ्झिए। हजारौं मसिना रौहरु आफ्नै टाउकाको छाला छेडेर भित्र पस्न थालेपछि रहमान छिन छिनमै बेहोस हुन थाल्यो उ रुन्थ्यो कराउथ्यो र भन्थ्यो मलाई काट। टुक्रा टुक्रा पार र सक। तर यसो नगर ,अनि फेरि बेहोस हुन्थ्यो ! रहमान एक दिनभरि बेहोस भो बेलुकि उसको टाउकामा चढाईएको उँटको छाला निकालियो र तिमी कोहौ भनेर सोधियो। तर उसैले सोध्यो म को हुँ ? राजाले भने तिमी यो देशका योद्धा हौ र तिम्रो नाम सुलेमान हो ! उस्ले राजाको चरण छोयो र खुब रोयो।

लडाईमा उसकी आमा पनि समातिएकी थिइन्। उनलाई चौपाय हेर्ने दास बनाईएको थियो। जो समुन्द्री किनार छेउ पशुहरु हेर्दै थिइन्। राजा सुलेमानलाई लिएर समुन्द्री किनार तिर जाँदै गर्दा राजाले सुलेमानकी आमा देखेर रथ रोके। सुलेमानलाई राजाले भने “सुलेमान मेरो राज्यमा एक बोक्सीले गर्दा भोकमरिको संभावना बढेको छ के तिमी त्यसको टाउको ल्याउन सक्छौ।

‘सुलेमानले भन्यो  ‘हुकुम होस सरकार ! ‘ राजाले हुकुम गरे ! सुलेमान रथबाट ओर्लियो र आफ्नी आमा भएको ठाँउमा पुग्यो ! आमा उसलाई अंकमाल गर्न खोज्दै थिईन तर सुलेमानले बिजुली गतिमा तरबार घुमायो र आमाको टाउको शरिरबाट अलग गरिदियो। महाराज !! मलाई सुलेमान नबनाईबक्स्योस ! म यो पाप गर्न सक्दिन !!! मलाई मेरो पार्टी सग्लै चाहिन्छ ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्