संसदको यो कार्यकालभरि कांग्रेस सरकारमा जाँदैन : प्रवक्ता शर्मा

Bishwaprakash_Sharma
  • 3
    Shares
लोकपाटी न्यूज

काठमाडौं। नेपाली कांग्रेसका प्रवक्ता विश्वप्रकाश शर्माले पार्टीलाई पाँच वर्ष विपक्षमा बस्ने प्रष्ट जनादेश रहेकोले भ्रममा नपर्न आग्रह गरेका छन्। आइतबार एक विज्ञप्ति जारी गरेर प्रवक्ता शर्माले जनताको जनादेश अनुसार नेपाली कांग्रेस कुनै पनि भड्कावबाट टाढा रहेने बताएका हुन्। उनले यस विषयमा कोही कसैलाई भ्रममा नपर्न पनि आग्रह गरेका छन्।

प्रधानमन्त्री केपी शर्मा ओलीसँग सभापति शेरबहादुर देउवाको भेटवार्ता सम्बन्धी खबरहरु सार्वजनिक भएपछि प्रवक्ता शर्माले यस्तो प्रतिक्रिया दिएका हुन्। नेकपाभित्र आन्तरिक विवाद भइरहेका बेला अध्यक्षसमेत रहेका प्रधानमन्त्री ओलीले सभापति देउवालाई शनिबार बालुवाटारमा भेटेको र आगामी दिनमा सहकार्यको प्रस्तावसमेत राखेको दाबी सहितका चर्चा भइरहेको छ।

तर यसतर्फ लक्षित गर्दै प्रवक्ता शर्माले नेकपाभित्रको द्वन्द्वसँग कांग्रेस निरपेक्ष रहेको उल्लेख गरे। ‘भ्रम, कोही कसैलाई केही छ भने- पाँच वर्ष विपक्षमा बस्ने प्रष्ट जनादेश छ कांग्रेसलाई,’ प्रवक्ता शर्माले भनेका छन्, ‘अत: कुनै पनि भड्कावबाट टाढा छौं, रहनेछौं।’

उनले घुमाउरो भाषामा सत्ताको जोडघटाउमा पार्टी नलागेको पनि उल्लेख गरेका छन्। ‘नेकपाको द्वन्द्वसँग विलकुल निरपेक्ष छौं। अत: यता या उताको जोड घटाउमा कांग्रेसको शिर गन्ने धृष्टता कोहीबाट नहोस्, सजग गराउँदछौं,’ शर्माले भनेका छन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्