सचिवालय बैठकअघि पाँच शीर्ष नेतालाई ओलीको पत्र

Oli_Prachanda
लोकपाटी न्यूज

काठमाडौं। प्रधानमन्त्री एवं नेकपा अध्यक्ष केपी ओलीले पार्टीका शीर्ष नेताहरुबाट पार्टी सचिवालय बैठक बोलाउन आएको दुई पेज लामो लिखित पत्रको जवाफमा पत्र लेखेका छन्। प्रधानमन्त्री ओलीले लेखेको जवाफ पत्रमा पार्टीमा उत्पन्न विवाद समाधानका लागि पार्टी बैठकको माग गर्ने शीर्ष नेताहरु माथि विभिन्न आरोप लगाएका छन्।

कात्तिक २२ मा नेकपा अध्यक्ष पुष्पकमल दाहाल ‘प्रचण्ड’, झलनाथ खनाल, माधवकुमार नेपाल, वामदेव गौतम तथा नारायणकाजी श्रेष्ठले ओलीलाई बालुवाटारमा भेटेर सचिवालय बैठकका लागि सहमति जनाउन दुई पाने पत्र बुझाएका थिए। ओलीले त्यसैको प्रतिवाद स्वरुप पाँच पाने पत्र लेखेका हुन्।

पाँच सचिवालय सदस्यले लेखेको पत्रमा ओलीले स्थायी कमिटीको निर्णय नमानेको, कोभिड नियन्त्रणमा प्रभावकारी भूमिका नखेलेको, रअ प्रमुखलाई भेटेको लगायतका विषय समेटेर उनको आलोचना गरिएको थियो। बिहीबार ओलीले लेखेको पत्रमा पाँच शीर्ष नेताहरुमाथि केही लगायतका आरोप लगाइएको सचिवालय सदस्यको भनाई छ। ओलीले लेखेको पत्रमा आफ्नाविरुद्ध घेराबन्दी भएको र पार्टीको निर्णयलाई कमजोर बनाएको र नेताहरूबाट गलत प्रचार गरेको लगायतका आरोप लगाएका छन्।

ती नेताका अनुसार पत्रमा आरोपको प्रत्यारोप मात्र छ, तर पार्टी विवाद कसरी समाधान गर्ने भन्ने विषयमा कुनै एजेन्डा आएको छैन। ओलीले प्रचण्डलाई सम्बोधन गरेर लेखेको पत्रमा खनाल, नेपाल, गौतम र श्रेष्ठलाई बोधार्थ दिइएको छ। यसैबीच शुक्रबार अपराह्न ४ बजे पार्टी सचिवालयको बैठक बस्दैछ। बैठकको एजेण्डा तय नभए पनि पाँच सदस्यले पत्रमा उल्लेख गरेकै विषयमा छलफल हुने आकलन गरिएको छ। बैठकका लागि दुवै पक्षले आ-आफ्नो तयारी पनि गरेका छन्।

भदौ २६ मा सकिएको स्थायी कमिटी बैठकले पार्टी एकताको रक्षा गर्ने, पार्टी र सरकार सञ्चालनमा सकारात्मक परिवर्तन गर्ने, पार्टी र सरकारलाई विचार र नीतिका आधारमा सञ्चालन गर्ने, पार्टी र सरकार दुवैलाई विधि र पद्धतिका आधारमा संस्थागत ढंगले सञ्चालन गर्ने, सरकारलाई जनमुखी ढंगले सञ्चालन गरी सफल पार्ने तथा आगामी चैतमा पार्टी एकताको संक्रमणकाललाई अन्त्य गर्ने गरी एकताको राष्ट्रिय महाधिवेशन गर्नेसहितका १५बुँदे प्रस्ताव पारित गरेको थियो ।

ती निर्णय कार्यान्वयनमा समस्या देखिएपछि सचिवालयका बहुमत सदस्यले बैठकको माग गर्दै सामूहिक पत्र लेखेका हुन् । यसबीचमा पार्टी प्रवक्ता श्रेष्ठले पनि दुई पत्र दुवै अध्यक्षलाई बैठकको माग गर्दै लेखेका छन्। चिवालयका बहुमत सदस्यहरुले पार्टीलाई विधि र पद्धतिमा चलाउनु पर्नेमा जोड दिँदै आएका छन्। पार्टी भित्र पनि ओलीको कार्यशैलीमाथि आलोचना हुँदै आएको छ।