नारायणी डेभपलमेन्ट बैंकले पुनः २००% हकप्रद प्रस्तावसहित बोलायो एजीएम

  • 46
    Shares
लाेकपाटी न्यूज

काठमाडौं। कतिपय वाणिज्य बैंकहरुभन्दा निकै राम्रो सेयर मूल्य रहेको नारायणी डेभलपमेन्ट बैंकले हकप्रद सेयरको प्रस्तावसहित माघ १६ गते वार्षिक साधारणसभा डाकेको छ। करिब ६ महिनाअघि समस्याग्रस्तबाट मुक्त भएको बैंकले फेरि पनि हकप्रद सेयर जारी गर्ने प्रस्ताव गरेको छ। बैंकले चुक्ता पुँजी ६ करोड ५६ लाख रुपैयाँको सत् प्रतिशत हकप्रद जारी गर्ने तयारी गरिरहेको छ।

यो जारीपछि चुक्ता पुँजी १३ करोड १२ लाख कायम हुन्छ। यसपछि पनि बैंकले एक बराबर २ को अनुपातमा हकप्रद जारी गर्ने प्रस्ताव साधारणसभामा लग्ने भएको छ। यसपछि चुक्ता पुँजी ३९ करोड ३७ लाख रुपैयाँ पुग्ने छ। चुक्ता पुँजी ५० करोड पुर्‍याउनुपर्ने नियामकीय प्रावधान छ।

बैंकले उपयुक्त संस्थासँग मर्जर वा प्राप्तिका लागि पनि साधारणसभामा एजेण्डा लैजाँदै छ। बाँकी पुँजी आफैं हालेरभन्दा पनि मर्जरबाट पुर्‍याउने बैंकको रणनीति देखिन्छ। कारोबार सुरु भएपछि सेयर मूल्य ३०० रुपैयाँबाट बढ्न थालेर एक महिनाभन्दा छोटो अवधिमा साढे ६ सय रुपैयाँ हाराहारीसम्म पुगेको थियो। संस्था गत साउन ८ गते समस्याग्रस्त स्थितिबाट मुक्त भएको थियो।

सञ्चालक र ब्यवस्थापनको मिलेमतोमा ऋण दुरुपयोग भएर खराब कर्जा उच्च दरले बढेपछि राष्ट्र बैंकले यसलाई २०७० चैत २७ गते समस्याग्रस्त घोषणा गरेको थियो। गत असोजको वित्तीय विवरण अनुसार कम्पनीको खराब ऋण अझै ७२।९८ प्रतिशत छ। संस्था ४७ लाख रुपैयाँ घाटामा छ।

नारायणीले धितोपत्र बोर्डबाट अनुमति पाएको १००% हकप्रद पनि बिक्री गर्न बाँकी नै रहेको छ । नेपाल राष्ट्र बैंकको निर्देशन बमोजिम जिल्लास्तरीय विकास बैंकको चुक्ता पुँजी न्यूनतम ५० करोड बनाउनुपर्ने भएकाले सोही अधिकृत, जारी तथा चुक्ता पुँजी वृद्धि गर्ने र प्रबन्धपत्र तथा नियमावली संशोधन गर्ने एजेन्डा पनि रहेको छ ।

अन्य कुनै बैंक तथा वित्तीय संस्थासँग मर्जर वा एक्विसिजनमा जानु परेमा सम्पूर्ण कामको अख्तियारी सञ्चालक समितिलाई दिने प्रस्ताव छ । नारायणीले वार्षिक साधारण सभा स्टार बैंक्वेट रत्ननगर, चितवनमा दिउँसो १ बजे सुरु गर्नेछ । वार्षिक साधारण सभा प्रयोजनका लागि पुस २९ गते बुक क्लोज गर्नेछ । पुस २८ गतेसम्म कायम रहने सेयरधनीले मात्र साधारण सभामा भाग लिन पाउनेछन् ।