केपी ओलीका नयाँ केन्द्रीय सदस्यले मान्यता पाएनन्

KP_Oli
  • 8.5K
    Shares
लोकपाटी न्यूज

काठमाडौं। नेकपा (बहुमत) ले प्रधानमन्त्री केपी शर्मा ओलीलाई पार्टीको साधारण सदस्यबाट निस्कासन गरेको छ भने निर्वाचन आयोगले विभाजित नेकपाका दुबै खेमालाई अलग अलग मान्यता नदिँदा बालुवाटारबाट थपिएका पौने एघार सय केन्द्रीय सदस्यको बैधता संकटमा परेको छ। आइतबार बसेको स्थायी कमिटी बैठकले ओलीलाई साधारण सदस्यता समेत नरहने गरी पार्टीबाट निश्कासन गरेको प्रवक्ता नारायणकाजी श्रेष्ठले जानकारी दिए।

पुस ५ गते प्रधानमन्त्री ओलीले प्रतिनिधिसभा विघटन गरेपछि नेकपा विभाजन भएको थियो। ओलीको कदम मुलुक र पार्टीको हितविपरित भन्दै पुस ६ गते बसेको बहुमत ९प्रचण्ड(माधव० पक्षको केन्द्रीय समिति बैठकले ओलीलाई पार्टी अध्यक्षबाट हटाएर माधवकुमार नेपाललाई अध्यक्षमा मनोनयन गरेको छ। त्यतिबेला अध्यक्षको जिम्मेवारीबाट हटाएपनि नेकपाले ओलीलाई केन्द्रीय सदस्यमा भने यथावत राखेको थियो ।

अध्यक्षबाट हटाएपनि ओलीले पार्टी र मुलुकको हितविपरितका गतिविधि नरोकेको भन्दै नेकपाले उनलाई तीन दिनको समयावधि तोकेर स्पष्टिकरण सोधेको थियो। तर,ओलीले स्पष्टिकरणको जवाफ नदिएपछि आइतबार बसेको स्थायी कमिटी बैठकले उनलाई साधारण सदस्यतासमेत नरहनेगरी कारवाही गरेको प्रवक्ता श्रेष्ठले जानकारी दिए।

प्रवक्ता श्रेष्ठका अनुसार पार्टी अध्यक्षबाट हटाएपछि पनि ओलीले राष्ट्र,जनता,संविधान र पार्टीका विरुद्ध लगातार गतिविधि गरेकोले पार्टी विधानबमोजिम उनलाई स्पस्टिकरण सोधिएको तर त्यसको जवाफ नआएपछि पार्टी सदस्यबाट हटाउने निर्णय गरिएको हो।

बैठकले पार्टीको कार्यालय सचिवमा गगंलाल तुलाधर र उपसचिवमा मोहन गौतमलाई नियुक्त गरेको छ। त्यस्तै केही दिनमै पार्टीका विभिन्न सांगठनिक संरचनाहरुमा पदपूर्ति गर्ने निर्णय पनि गरेको प्रवक्ता श्रेष्ठले बताए। बैठकले माघ ९ गते काठमाडौंमा सम्पन्न जनसभा भव्य रुपमा सफल भएको निष्कर्ष निकाल्दै अर्को चरणको आन्दोलनका कार्यक्रम आज बस्ने बैठकले सार्वजनिक गर्ने निर्णय गरेको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्