गलत व्यक्तिलाई जनताले दण्डित गर्छन् : ईश्वर पोखरेल

Ishwor_Pokhrel
  • 510
    Shares
लोकपाटी न्यूज

काठमाडौं। उपप्रधानमन्त्री ईश्वर पोखरेलले अगामी वैशाखमा निर्वाचन हुने बताएका छन्। काठमाडौं महानगरपालिका-५ मा निर्माण भएको भीमसेनथान मन्दिरको उद्घाटन गर्दै उनले यसका लागि चुनावका लागि तयार हुन आग्रह समेत गरे।

राजनीतिक स्थिरताका लागि मध्यावधि निर्वाचन गर्नुपरेको उनको भनाइ छ। उनले भने, ‘चुनावमा जनताले सही व्यक्तिलाई पुरस्कृत र गलतलाई दण्डित गर्ने छन्। जनताभन्दा ठूलो न्यायाधीश अरू कोही हुँदैनन्। यसैले ताजा जनादेशका लागि सबै तयार हुनुपर्छ।’

निर्वाचनपछि राजनीतिक स्थिरता कायम हुने तथा विकास र समृद्धिको सपना साकार हुने उपप्रधानमन्त्री पोखरेलको भनाइ छ। बागमती प्रदेश सरकार र स्थानीय जनसहभागितामा भीमसेनथान मन्दिरको पुनर्निर्माण गरिएको हो। काठमाडौं निर्वाचन क्षेत्र नं ५ क का प्रदेश सांसद नारायण सिलवालले मन्दिर पुनर्निर्माणमा पहल गरेका थिए।

सो अवसरमा उनले मन्दिर पुनर्निर्माण गर्न सफल भएकामा खुसी व्यक्त गर्दै हाँडीगाउँबासीको सहयोगकै कारण योजना सफल भएको बताए। स्थानीयको करिब १६ लाख सहयोग उपलब्ध भएको उनले जानकारी दिए।

कार्यक्रममा काठमाडौं महानगरपालिकाका प्रमुख विद्यासुन्दर शाक्यले महानगरभित्रका सबैखाले विकास निर्माणका कामका लागि आफू प्रतिबद्ध रहेको बताए। संस्कृति र सम्पदा बचाउनका लागि महानगरले धेरै काम गरिरहेको उनको भनाइ थियो। रासस