संसद पुनर्स्थापना हुने देखेपछि केपी ओली आत्तिए : पौडेल

Ramchandra_Poudel
  • 11.3K
    Shares
लोकपाटी न्यूज

काठमाडौं। नेपाली कांग्रेसका वरिष्ठ नेता रामचन्द्र पौडेलले प्रतिनिधिसभा विघटनको विरोधमा गरिने प्रदर्शन पार्टीको संकल्प र निर्णयले हुने बताएका छन्। सुनसरीमा आइतबार आयोजित पत्रकार सम्मेलनमा वरिष्ठ नेता पौडेलले जुलुस, सभा र विरोध प्रदर्शन पार्टीको संकल्प र निर्णयले हुने बताएका हुन्।

केही दिनअघि पोखरामा आयोजित कार्यक्रममा सभापति शेरबहादुर देउवाले नेकपाको प्रचण्ड-नेपाल समूहको जस्तो प्रदर्शन गर्न कांग्रेससँग पैसा नभएको बताएका थिए। त्यसको जवाफ दिँदै आइतबार पौडेलले भने, ‘पैसाले गर्ने हो र जुलुस, सभा र विरोध प्रदर्शन ? यसका लागि त पार्टीको संकल्प र निर्णयले पुग्छ। पैसाले जुलुस गर्नु पर्दैन।’

पौडेलले पार्टीले आह्वान गरे कार्यकर्ता स्वतःस्फूर्त सडकमा आउने बताए। ‘प्रदर्शनका लागि पार्टीले निर्णय गरेर आह्वान गरे कार्यकर्ता र जनता सडकमा स्वतःस्फूर्त आउँछन्,’ उनले भने, ‘संविधान बचाउने लडाइँमा जनता र कार्यकर्ता आफैँ आउँछन्।’ पौडेलले सर्वोच्च अदालतले संसद पुन:स्थापना गर्न लागेपछि प्रधानमन्त्री केपी शर्मा ओली आत्तिएको पनि बताए।

उनले विराटनगरमा शनिवार भएको सभामा प्रधानमन्त्री ओलीले अदालतबाट प्रतिनिधिसभा विघटनको कदम सदर नभए आन्दोलन गर्ने अभिव्यक्ति धम्की र आतेस दुवै भएको बताए। ‘प्रधानमन्त्री पदको गरिमा भुलेर अदालतबाट आफ्नो असंवैधानिक कदम सदर नभए आन्दोलन गर्छौं भन्ने गैरजिम्मेवार अभिव्यक्ति दिँदै छन्,’ पौडेलले भने, ‘यो अदालतमाथि धम्की त हुँदै हो सँगसँगै अदालतले संसद पुनः स्थापना हुने भयो भनेर आत्तिएको अभिव्यक्ति पनि हो।’

उनले प्रधानमन्त्री ओलीले प्रतिनिधिसभा पुन:स्थापित भए विकृति आउँछ भन्दै दिएको अभिव्यक्तिलाई आकाशतर्फ हेरे थुकेको उपमा दिए। ‘प्रधानमन्त्री भन्दै छन्- सांसद अपहरणदेखि प्रतिनिधिसभा विघटनसम्मका विकृति निम्त्याउने ओलीले नै प्रतिनिधिसभा पुनः स्थापित भए विकृति आउँछ रे !,’ पौडेलले भने, ‘ओली आकाशतिर हेरेर थुक्दै छन्।’

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्