युवा नेता भण्डारीको ‘जनयुद्धका हस्ताक्षर’ नामक पुस्तक सार्वजनिक

pic 2
  • 29
    Shares
लोकपाटी न्यूज

काठमाडौं। नेकपाका विद्यार्थी नेता तिलकराज भण्डारीको ‘जनयुद्धका हस्ताक्षर’ नामक पुस्तक सार्वजनिक भएको छ। मंगलबार काठमाडौंको प्रज्ञा प्रतिष्ठानमा आयोजित कार्यक्रममा नेकपा अध्यक्ष पुष्पकमल दाहाल ‘प्रचण्ड’ ले पुस्तक विमोचन गरेका हुन्।

तत्कालीन नेकपा माओवादीले सञ्चालन गरेको १० वर्षे जनयुद्धका क्रममा आदन–प्रदान भएका चिठीपत्रहरु समेटेर भण्डारीले पुस्तकको रुप दिएका हुन् । पुस्तकमा ११२ वटा चिठीपत्रहरु छन्। यसरी पत्र लेख्नेहरू केही सहिद भइसकेका छन् भने केही वेपत्ता छन्। पुस्तकमा समावेश चिठीले त्यतिबेलाको जनयुद्धको वास्तविक धरातल बुझ्न सहयोग पु¥याउने विमोचन कार्यक्रममा बोल्ने वक्ताहरूले बताएका छन्। पुस्तक विमोचनपछि बोल्दै अध्यक्ष प्रचण्डले दस्तावेजको रुपमा जनयुद्धको हस्ताक्षर रहेको बताए।
औपचारिक पुस्तक पढ्दा फरक खालको अनुभूति हुने भए पनि अनौपचारिक विषयका पुस्तक पढ्दा आनन्दको अनुभूति आउने र त्यहाँ भएका कुराहरुलाई भित्रदेखि अनुभव गर्न सकिने बताए।

उनले पुस्तक पढ्दा युद्धका अविष्मरणीय दिनहरू सम्झना हुने र त्यतिबेलाको संवेग, भावना, विचार र तीव्रतालाई बुझ्न सकिने बताउँदै भने, ‘यो पुस्तकले नयाँ पुस्तालाई हिजोको परिस्थिति बुझ्ने मौका पनि दिनेछ। ’प्रचण्डले यसअघि पढेका जनयुद्धका पुस्तकभन्दा यो पुस्तक मौलिक रहेको बताए।

२०५४ सालमा अखिल (क्रान्तिकारी) मा संगठित भएर राजनीतिक यात्रा सुरु गरेका भण्डारी २०५६ सालबाट जनयुद्धको भूमिगत राजनीतिमा होमिएका थिए । २०५८ साल भदौ २८ गतेको प्रथम जिल्ला भेलाबाट सल्यान जिल्ला सदस्य, ०५९ मा जिल्ला समिति उपाध्यक्ष, ०६१ मा जिल्ला अध्यक्ष हुँदै भण्डारी जनयुद्धमा सक्रिय थिए। पछि उनी विद्यार्थी राजनीतिमा अखिल (क्रान्तिकारी) को केन्द्रीय उपाध्यक्ष भएका व्यक्ति हुन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्