लोकपाटी न्यूजकाठमाडौं। जनता समाजवादी पार्टी (जसपा) का पदाधिकारीहरुको अनौपचारिक बैठक केन्द्रीय कार्यालय बालकुमारीमा जारी छ। नयाँ सरकार गठनको विषयमा निर्णयमा पुग्न जनता समाजवादी पार्टी (जसपा)का शीर्ष नेता (पदाधिकारी)हरु छलफलमा जुटेका हुन्।
छलफलमा अध्यक्षद्वय महन्थ ठाकुर तथा उपेन्द्र यादव, संघीय परिषद् अध्यक्ष बाबुराम भट्टराई र वरिष्ठ नेताहरुद्वय राजेन्द्र महतो र अशोक राई सहभागी छन्।
सोमबार प्रधानमन्त्री केपी शर्मा ओली प्रतिनिधि सभा बैठकबाट विश्वासको मत लिन असफल भए। त्यसपछि राष्ट्रपति विद्यादेवी भण्डारीले बहुमतका आधारमा सरकार गठनका लागि वैशाख ३० गते (बिहीबार) साँझ ९ बजेसम्मको समयसीमा तोकेकी छन्।
तोकिएकै समयसीमाभित्र सरकार गठनका लागि दलहरु सक्रिय छन्। नयाँ सरकार गठनका लागि नेपाली कांग्रेस, माओवादी केन्द्र र जसपाकै उपेन्द्र–बाबुराम पक्ष सक्रिय भएर लागेको छ।
