महन्थ ठाकुरले आफू पक्षका सांसदलाई पुर्‍याए रिसोर्टमा

Mahanth_Thakur_Rajendra_Mahato
  • 224
    Shares
लोकपाटी न्यूज

काठमाडौं। जनता समाजवादी पार्टी (जसपा)का अध्यक्ष महन्थ महन्थ र राजेन्द्र महतो पक्षका सांसदहरू एकै ठाउँमा भेला भएका छन्। सरकार गठनका लागि विपक्षी दलहरूलाई दिइएको समयसीमा सकिनै लाग्दा जसपाका ठाकुर पक्षीय सांसदहरू एकै ठाउँमा भेला भएका हुन्।

अध्यक्ष ठाकुरले आफू पक्षका सांसदलाई पार्टी कार्यालय बबरमहलबाट लिएर भक्तपुरको एक रिसोर्टमा राखेका छन्। एक सांसदले भने, ‘अहिले हामी एक रिसोर्टमा छौँ। हामी पक्षकालाई यहाँ ल्याइएको छ। १७ सांसदमध्ये १३ जना रिसोर्टमा छौँ।’

सांसदहरूलाई रिसोर्टमा व्यवस्थापन गर्न वरिष्ठ नेता राजेन्द्र महतो पनि साथमै रहेका छन्। ‘कुन रिसोर्टमा भन्न मिल्दैन। यहाँ राजेन्द्र महतो पनि हुनुहुन्छ। सबै व्यवस्थापन गरेर उहाँ फर्किनुहुन्छ,’ ती सांसदले भने। जसपाका बहुमत सांसद आफ्नो पक्षमा रहेको दाबी गरे पनि ठाकुरले १३ सांसदलाई मात्रै रिसोर्टमा भेला गराउन सकेका हुन्।

ठाकुर र महतोले बिहीबार दिउँसो नेपाली काँग्रेसका सभापति शेरबहादुर देउवासँग भेटेका थिए। उनीहरुबीच के कुरा भयो भन्ने बाहिर आएको छैन। देउवालाई भेटेर आएपछि अध्यक्ष ठाकुर र महतो पक्षको सांसद भेला भएका हुन्।

जसपामा उपेन्द्र यादव र बाबुराम भट्टराई कांग्रेस सभापति देउवा नेतृत्वको गठबन्धन सरकारका पक्षमा छन् भने ठाकुर र महतो कुनै पनि सरकार निर्माणमा संलग्न नभएर तटस्थ बस्ने लाइनमा छन्। जसपा दुई धारमा विभाजित भएपछि काँग्रेसले बहुमतको दाबी पेस गर्ने नगर्ने अन्योल छ। काँग्रेसलाई बहुमतको दाबी गर्न एकीकृत जसपा आवश्यक छ।

वैशाख २७ गते प्रधानमन्त्री ओलीले संसद्मा मागेको विश्वासको मत नपाएपछि पदमुक्त भएका छन्। दुई वा दुईभन्दा बढी दल मिलेर बहुमतको सरकार दाबी गरेर राष्ट्रपतिसमक्ष निवेदन पेस गर्ने आज बेलुका ९ बजे अन्तिम समय तोकिएको छ। समयसीमा अगावै निवेदन पेस नभए संविधान ७६ (३) अनुसार संसद्मा रहेको सबैभन्दा ठुलो दलको रूपमा केपी ओलीले सरकारको नेतृत्व गर्नेछन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्