सिंचाइमा खपत हुने विद्युत निःशुल्क बनाउँछु : मन्त्री भुसाल

Pamfa_Bhusal
लोकपाटी न्यूज
0 Shares

काठमाडौं। ऊर्जा, जलस्रोत तथा सिंचाइमन्त्री पम्फा भुसालले सिंचाइमा खपत हुने विद्युत महसुल निःशुल्क बनाउने घोषणा गरेकी छन्। उनले कृषि क्षेत्रलाई आत्मनिर्भर बनाई मुलुकको अर्थतन्त्रलाई टेवा पुर्‍याउनका लागि आफूले सिंचाइमा खपत हुने विद्युत महसुल निःशुल्क बनाउने लक्ष्य लिएको स्पष्ट पारिन्।

शुक्रबारबाट काठमाडौंमा सुरु भएको नेपाल हस्तकला महासंघको ४१औं वार्षिक साधारण सभामा मन्त्री भुसालले गत मंसीर १ गतेदेखि सिंचाइमा खपत हुने विद्युतको शुल्क ५० प्रतिशत घटाएको उल्लेख गरिन्। उनले अब त्यसलाई निःशुल्क बनाएर मुलुकको अर्थतन्त्रमा टेवा पुर्‍याउन आफू लागि परेको बताइन्। नेपालमा उत्पादन हुने वस्तुहरू आयात नगर्न पनि व्यवसायीसँग आग्रह गरिन्।

नाफा हुन्छ भन्दैमा प्लास्टिकका फूलहरू आयात गर्ने काम व्यवसायीहरूले गर्न नहुने उनको भनाइ थियो। उद्योगीहरूले मुलुकको अर्थतन्त्रलाई टेवा पुर्‍याउने खालको वस्तुहरूको उत्पादन र बिक्री वितरणमा ध्यान दिनुपर्ने उनको भनाइ थियो। मन्त्री भुसालले नेपालको अर्थतन्त्रलाई बलियो बनाउन नेपाली हस्तकलाका वस्तुहरूको निर्यातमा जोड दिनुपर्ने बताइन्।

‘नाफा हुन्छ भनेर जे पनि व्यवसाय नगरौं। राष्ट्रिय अर्थतन्त्रलाई टेवा पुग्ने व्यवसाय गरौं। हाम्रो देशभित्र उत्पादन हुने वस्तु चाहिँ आयात नगरौं,’ उनले भनिन्, ‘अहिले साढे २ खर्बको वार्षिक रूपमा खाद्यान्न, तरकारी र फलफूल आयात हुन्छ। त्यसलाई रोक्नका लागि कृषिमा आत्मनिर्भर बनौं।’

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्