खेल क्षेत्रमा राजनीति नगर्नुहोस् : मन्त्री अथक

लोकपाटी न्यूज
7 Shares

काठमाडौं। युवा तथा खेलकुद मन्त्री महेश्वर गहतराज ‘अथक’ले खेल क्षेत्रमा राजनीति नगर्न आग्रह गरेका छन्। अखिल नेपाल फुटबल संघ (एन्फा) को २१औँ चुनावी साधारण सभाको उद्घाटन सत्रमा मन्त्री अथकले एन्फामा देखिएको समस्या सहमतिमा समाधान गरेर अगाडी बढ्न आग्रह गरेका हुन्।

राज्यले खेलकुदलाई प्राथमिकतामा राखेको उल्लेख गर्दै उनले भने, ‘राज्यले फुटबलमा ठुलो लगानी गरिरहेको छ, विशेष गरी नेपालमा फुटबलका पूर्वाधारहरू नै बढी मात्रामा रहेका छन्।’ यद्यपि नेपालमा खेलकुदलाई सामान्य क्रियाकलापका रूपमा मात्र हेर्ने प्रवृत्तिले खेलकुद क्षेत्रको विकासमा चुनौती थपिएको उनले बताए।

‘नेपालमा एउटा चुनौती छ, खेलकुदको विषय बुझ्ने सिंहदरबारमा छैनन्। खेल सामान्य गतिविधि वा क्रियाकलापको क्षेत्र हो भन्ने बुझाइ छ। यसरी खेल क्षेत्रको विकास सम्भव छैन,’ मन्त्री अथकले भने। खेललाई उद्योगका रूपमा विकास गर्नुपर्ने उनको भनाई थियो।

‘नेपाल प्राकृतिक रूपले सुन्दर छ। यहाँको खेलकुदलाई पर्यटनसँग जोड्न सकियो भने धेरै उपलब्धि हुनेछ। त्यसका लागि अन्तर्राष्ट्रिय स्तरमा लविङ गर्न आवश्यक छ,’ उनले भने, ‘हाम्रो जस्तो देशमा खेल पर्यटनको सम्भावना अत्यधिक मात्रामा रहेको छ।’ खेललाई व्यावसायिक तथा आर्थिक क्षेत्रका रूपमा समेत विकास गर्नुपर्ने बताउँदै मन्त्री अथकले भने, ‘आगामी विश्वको उदाउँदो उद्योग भनेको नै खेल क्षेत्र हो।’

नेपाली खेलाडीहरूलाई अन्तर्राष्ट्रिय स्तरका प्रतिस्पर्धी खेलाडीका रूपमा उत्पादन गर्न विशेष पहल गर्नुपर्ने आवश्यकता रहेको उल्लेख गर्दै उनले गोर्खा स्प्रिडलाई अगाडी बढाउने गरी एन्फाको आगामी नेतृत्वले रणनीति बनाउनुपर्नेमा समेत जोड दिए।