कति दलले पाउलान् राष्ट्रिय दलको मान्यता ?

Election_Dal
लोकपाटी न्यूज
7 Shares

काठमाडौं। प्रतिनिधिसभामा ७ दलले मात्रै राष्ट्रिय दलको मान्यता पाउने देखिएको छ। यद्यपि प्रतिनिधिसभामा १२ राजनीतिक दल सहभागी हुन पाउने भएका छन्।

राष्ट्रिय दलको मान्यता पाउन प्रत्यक्षतर्फ एक सिट र समानुपातिकतर्फ सदर मतको ३ प्रतिशत ‘थ्रेस होल्ड ‘ कटाउनुपर्ने कानुनी व्यवस्था छ। यस व्यवस्था अनुसार ७ दलले मात्रै राष्ट्रिय दलको मान्यता पाउने देखिएको हो।

नेपाली काँग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टीले राष्ट्रिय दलको मान्यता पाउनेछन्।

नेकपा एकीकृत समाजवादीले ‘थ्रेस होल्ड’ कटाउन संघर्ष गरिरहेको छ। समाजवादीले अहिलेसम्म २ लाख ९४ हजार मत प्राप्त गरे पनि ‘थ्रेस होल्ड’ कटाउन हम्मे हम्मे देखिएको छ।

राष्ट्रिय जनमोर्चा, नेपाल मजदुर किसान पार्टी, लोकतान्त्रिक समाजवादी पार्टी र नागरिक उन्मुक्ति पार्टीले पनि थ्रेस होल्ड कटाएका छैनन्।