चितवन महोत्सवको तयारी तीव्र

लोकपाटी न्यूज
5 Shares

चितवन। चितवनको गौरव र गरिमामय प्रस्तुतिको रुपमा आयोजना हुँदै आइरहेको चितवन महोत्सवको १४औँ संस्करणको तयारी तीव्र पारिएको छ। उद्योग वाणिज्य संघ चितवनको आयोजनामा हरेक दुई वर्षमा हुँदै आइरहेको यही पुस २५ देखि माघ ४ गतेसम्म नारायणगढको नारायणी नदी किनारमा हुँदैछ।

महोत्सवका मूल संयोजक एवं उद्योग वाणिज्य संघ चितवनका अध्यक्ष चुननारायण श्रेष्ठले महोत्सवलाई सफल पार्न विभिन्न ३० वटा कार्यगत समिति निर्माण गरिएको बताए। महोत्सव स्थलमा अहिले जमिन सम्म्याउने, पानी छर्कने तथा स्टल निर्माणको काम भइरहेको श्रेष्ठले जानकारी दिए। विगतका महोत्सवहरू भन्दा यस महोत्सव पृथक् बनाइने भन्दै उनले महोत्सवमा करिब ५०० स्टल रहने जानकारी दिए। महोत्सवमा स्थानीय उत्पादनलाई प्राथमिकता दिइने उल्लेख गर्दै अध्यक्ष श्रेष्ठले घरेलु तथा लघु उद्योगको उत्पादनलाई प्रवर्द्धन गरिने बताए।

उद्योग वाणिज्य संघ चितवनका पूर्वअध्यक्ष एवं आर्थिक समिति संयोजक सहनलाल प्रधानले यस वर्ष महोत्सवमा कृषिलाई प्राथमिकता दिइने बताए। ‘विगतमा हामीले माछा, मौरी, केरा लगायत विभिन्न उत्पादनलाई प्राथमिकता दिएका थियौं,’ प्रधानले भने, ‘यस पटकको महोत्सवमा पनि कृषिलाई प्राथमिकता दिइने भए पनि उत्पादनका बारेमा छलफल भइरहेको छ।’

महोत्सवमा बाल उद्यान सहित अटो, कृषि, स्वास्थ्य, शिक्षा, सूचना र प्रविधिसहितका स्टलहरू हुने बताए। महोत्सव स्थलमा ज्येष्ठ नागरिक, अशक्त, अपाङ्गलाई निःशुल्क प्रवेश दिइने भन्दै उनले सर्वसाधारणका लागि ६० तथा विद्यार्थीका लागि ३० को टिकटको व्यवस्था गरिएको बताए। उद्योग वाणिज्य संघ चितवनका कार्यकारी निर्देशक निलबहादुर केसीले यस महोत्सवमा पनि कृषि, पर्यटन, स्वास्थ्य र शिक्षालाई प्राथमिकतामा राखेर स्टलहरू निर्माण हुने बताए।

‘महोत्सवमा मेड इन नेपाल र मेड इन चितवन भनेर रहनेछ,’ केसीले भने, ‘साना उद्योगमा प्रयोग हुने मेसिनरीहरुलाई समेत प्रवर्द्धन गर्दै युवा स्वरोजगारलाई जोड दिनेगरी महोत्सव हुँदैछ।’ न्यून पुँजी लगानी गरी लघु उद्योग सञ्चालन गर्न सकिने उपकरणहरू महोत्सवमा रहने केसीको भनाइ छ।

उन महोत्सव अवधिमा स्वास्थ्य, शिक्षा, पर्यटन, पूर्वाधारसहितका विषयमा राष्ट्रियस्तरको सेमिनार आयोजना हुने बताए। चितवनलाई जैविक विविधताको भूमि भनेर चिनाउने गरी महोत्सव स्थलमा विभिन्न जनावरहरूको आकृति राखिने उनको भनाइ छ। ‘चितवनको जैविक विविधतालाई समेत प्रवर्द्धन गर्नेगरी महोत्सवमा विशेष आकर्षण रहनेछ,’ केसीले भने, ‘चितवन चिनाउने हात्ती, गैँडा, गोहीलगायतका जनावरहरूको प्रतिमा निर्माण गरेर राख्ने तयारी भइरहेको छ।’

यस पटकको चितवन महोत्सवको मुख्य प्रायोजकको रुपमा ‘सुपर जनरल इन्टरनेशनल’ रहेको छ। सुपर जनरल इन्टरनेशनल घरमा प्रयोग हुने विद्युतीय वस्तुहरू (होम एपलाइनसेस)को उत्पादन गर्ने दुबईको कम्पनी हो। यसको आधिकारिक विक्रेताकोरुपमा चितवनको नारायणगढस्थित लीलाचोकमा अल्फा इलेक्ट्रोनिक्स रहेको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्