नेप्सेमा छलाङ, कतिको भयो कारोबार ?

लोकपाटी न्यूज
6 Shares

काठमाडौं। नयाँ सरकार गठनको प्रक्रियाले नयाँस्वरुप लिएपछि धितोपत्र बजारले त्यसलाई स्वागत गरेको छ। धितोपत्र बजारमा शेयर कारोबार मापक नेप्से परिसूचक आज उच्च अंकले वृद्धि भएको छ।

नेपाल स्टक एक्सचेन्जका अनुसार आजको कारोबारमा नेप्से परिसूचक ५६ दशमलव ८८ अंकले वृद्धि भई एक हजार नौ सय २४ दशमलव शून्य नौ विन्दुमा पुगेको छ। यो दिनको कारोबारमा ठूला कम्पनीको कारोबार मापक सेन्सेटिभ परिसूचक आठ दशमलव ३८ अंकले उकालो लागेर तीन सय ७५ दशमलव ४५ मा पुगेको छ।

नेप्सेका अनुसार कारोबार भएका कूल १३ उपसमूहमध्ये आज अन्य उपसमूहको मात्रै शेयर मूल्यमा गिरावट आएको छ। यस्तै १२ उपसमूहको शेयर मूल्य भने उकालो लागेको छ। कारोबार भएका कम्पनीमध्ये दुई सय तीन उपसमूहको शेयर मूल्यमा वृद्धि भएको छ भने चार उपसमूहको शेयर मूल्यमा गिरावट आउँदा एउटा उपसमूहको शेयर मूल्यमा कुनै परिवर्तन भएको छैन।

आज कूल ५६ लाख ५३ हजार ५३ कित्ता शेयर दुई अर्ब नौ करोड ७० लाख ४९ हजार नौ सय ४१ मूल्यमा खरिद बिक्री भएका छन्। सोमबारको कारोबारपछि बजार पुँजीकरण २७ खर्ब ८२ अर्ब २७ करोड एक लाख ४१ हजार एक सय ३७ पुगेको छ।

नेप्सेका अनुसार कारोबार रकमका आधारमा दूरसञ्चार प्राधिकरण शीर्ष स्थानमा छ। सो कम्पनीको २० करोड ८८ लाख सात हजार दुई सय ४४ बराबरको शेयर कारोबार भयो। त्यस्तै, हिमालयन डिस्टिलरी ११ करोड ११ लाख ४७ हजार ७७, नवील बैंक नौ करोड ११ लाख २१ हजार एक सय ५०, रिडी हाइड्रोपावर सात करोड २६ लाख १७ हजार चार सय सात, एनआइसी एशिया बैंक छ करोड ८७ लाख २३ हजार पाँच सय नौ बराबरको कारोबार भई शीर्ष पाँचभित्र पर्न सफल भए।

नेप्सेका अनुसार आज चार कम्पनीको शेयर मूल्य १० प्रतिशतले वृद्धि भई सकारात्मक सर्किट लागेको छ। जसमा गुर्खाज फाइनान्स, धौलागिरि लघुवित्त, खप्तड लघुवित्त, सिर्जनशील लघुवित्त छन्। रिलायन्स फाइनान्सको शेयर मूल्य नौ दशमलव ९८ प्रतिशत बढेको छ।

यस्तै नेपाल दूरसञ्चार कम्पनीको शेयर मूल्य पाँच दशमलव ५६, सिवासी नेपाल लघुवित्तको शेयर मूल्य चार दशमलव ६७, सिद्धार्थ इन्भेस्टमेन्ट ग्रोथ स्किम दोस्रो दुई दशमलव १३, सिद्धार्थ बैंकको ऋणपत्र दुई र कुमारी बैंकको ऋणपत्रका लगानीकर्ताले एक दशमलव ९९ प्रतिशतले गुमाएका छन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्