नेपाल टी-ट्वाटी क्रिकेट : विराटनगर विजयी

Cricket_TU
फाइल तस्बिर
लोकपाटी न्यूज
5 Shares

काठमाडौं। राजधानीमा जारी पहिलो संस्करणको नेपाल टी-ट्वाटी क्रिकेट लिगमा विराटनगर सुपर किङ्ग्स विजयी भएको छ। कीर्तिपुरस्थित त्रिवि क्रिकेट मैदानमा आज भएको खेलमा विराटनगर पोखरा एभेन्जर्सलाई आठ विकेटले पराजित गर्दै विजयी भएको हो।

पोखराले विराटनगरलाई जितका लागि एक सय ३६ रनको चुनौती दिएको थियो। जवाफमा विराटनगरले १८ दशमलव चार ओभरमा दुई विकेट गुमाएर एक सय ३८ रन बनायो। विराटनगरको जितमा रोहित पौडेलले अविजित ७१ रनको योगदान दिए। उनले ५७ बलमा तीन छक्का र छ चौकाको मद्दतमा ७१ रनको योगदान दिएका हुन्।

त्यसैगरी गौरान्सु शर्माले ३३ रन थपे भने हुसेन तलातले २८ रनको योगदान गरे। बलिङमा पोखराका अमिर हम्जा र जाहिर खानले समान एक/एक विकेट लिए। त्यसअघि टस हारेर पहिले ब्याटिङ थालेको पोखराले निर्धारित २० ओभरमा छ विकेट गुमाउँदै एक सय ३५ रन बनाएको थियो। पोखराका लागि अमिर हम्जाले सर्वाधिक ३७ रनको योगदान दिए भने सुमित महर्जनले २६ रन बनाए।

त्यसैगरी कप्तान उपुल थरङ्गाले २५ रन बनाउँदा प्रतिशत जिसिले अविजित १३ तथा आसिफ शेखले ११ रन जोडे। विराटनगरका कप्तान आन्द्रे म्याकार्थीले तीन विकेट लिए भने साहब आलम, राज नानन र नन्दन यादवले समान एक/एक विकेट लिए। यससँगै चार खेल खेलेको विराटनगरले दुई खेलमा जित हात पार्दै चार अंक जोडेको छ। विराटनगर अंक तालिकाको तेस्रो स्थानमा छ। त्यस्तै पाँच खेल खेलको पोखरा भने पाँचैँ खेलमा हार बेहोर्दै अंकताकिकाको तेस्रो स्थानमा छ।

प्रतियोगितामा चार खेल खेलेको लुम्बिनी अल स्टार अपराजित रहदै आठ अंकका साथ लिगको शीर्ष स्थानमा छ। काठमाडौं नाइट्सले तीन खेलमा दुई जित हात पार्दै चार अंकका साथ दोस्रो स्थानमा छ। त्यसैगरी जनकपुर रोयल्स तीन खेलमा दुई जित हात पार्दै नेटरनरेटका आधारमा चौँथो तथा फार वेस्ट युनाइटेड पाँचौँ स्थानमा छ। तीन खेल खेलेको फार वेस्टले एक खेलमा जित हात पार्दै दुई अंक जोडेको छ। प्रतियोगिताको विजेता टोलीले ५५ लाख तथा उपविजेताले ३० लाख हात पार्नेछन्।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्