एकसाथ प्रदर्शन हुँदै ‘तिम्रो मेरो साथ’ र ‘गुञ्जन’

Gunjan_Timro-Mero-Saath
लोकपाटी न्यूज
8 Shares

काठमाडौं। दुई नेपाली चलचित्र ‘तिम्रो मेरो साथ’ र ‘गुञ्जन’ एकसाथ प्रदर्शन भइरहेका छन्। केही समययता सातामा एक मात्र नेपाली चलचित्र प्रदर्शन भइरहेको थियो। यद्यपि यो साता तिम्रो मेरो साथ र गुञ्जन प्रदर्शन गरिएको छ।

प्रेमकथामा आधारित चलचित्र माघेसंक्रान्तिलाई लक्षित गर्दै प्रदर्शनमा आएको हो। साम्राज्ञी राज्यलक्ष्मी शाह, पुष्प खड्का र सन्दीप क्षेत्रीको मुख्य भूमिका रहेको ‘तिम्रो मेरो साथ’ले चितवन प्रिमियममार्फत सकारात्मक प्रतिक्रिया बटुलेको निर्मातासँगै निर्देशक रहेका रमेश एमके पौडेलले जानकारी दिए।

‘प्रेमकथालाई दर्शकले रुचाउनुभयो। निर्माताका रूपमा अन्य चलचित्रमा आवद्ध भए पनि निर्देशनमा डेब्यु गर्दा नयाँ अनुभव भइरहेको छ,’ उनले भने। सवीर श्रेष्ठको कार्यकारी निर्माण र लेखन रहेको उक्त चलचित्रमा शिव ढकालले छायांकन, सुवास भुसाल/योगेश काजीको संगीत, रामजी लामिछानेको कोरियोग्राफी र भूपेन्द्र अधिकारीले सम्पादन गरेका छन्।

यस्तै द्वन्द्व निर्देशकका रूपमा दुई दशकदेखि सक्रिय रहेका अष्टमान महर्जनले ‘गुञ्जन’मार्फत चलचित्र निर्देशनमा डेब्यु गरेका छन्। ‘मैले द्वन्द्वप्रधान चलचित्र बनाउँछु अपेक्षा धेरैमा थियो। यद्यपि निर्देशक बन्दै गर्दा मैले राम्रो कथालाई रोजेको हुँ,’ उनले भने।

हीराकृष्ण शाहीको प्रस्तुति र सुनिता शाहीको निर्माणमा बनेको उक्त चलचित्रमा सारा सिर्पाली, कबिर खड्का, प्रितमराज सेन्चुरी, सरोज खनाल, हिउँवाला गौतम, ऋचा थापा, रोहन शाही, निरुता स्याङतान, कञ्चन चालिसे, सुस्मिता बराल, इभा श्रेष्ठ, अमोद भट्ट, आइपी आचार्य, अमेश न्यौपानेलगायतले अभिनय गरेका छन्। चलचित्र गुञ्जनमा महेश दवाडीको लेखन, राजेश श्रेष्ठको छायांकन, कविराज गहतराजको नृत्य निर्देशन र विपिन मल्लको सम्पादन रहेको छ।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्