लोकपाटी न्यूजबेइजिङ। चीनको औपचारिक भ्रमणमा रहेका प्रधानमन्त्री पुष्पकमल दाहाल ‘प्रचण्ड’ र चिनियाँ कम्युनिष्ट पार्टीको केन्द्रीय समितिको राजनीतिक ब्युरो सदस्य एवं सो पार्टीको छोङछिङ महानगरपालिका सचिव युआन चियाचुनबीच भेटवार्ता भएको छ।
प्रधानमन्त्री प्रचण्ड आज चिनियाँ सहर छोङछिङ पुगेका हुन्। आज छोङछिङ महानगरपालिकामा उनले सो भेटवार्ता गरेका हुन्। वार्तामा द्विपक्षीय हित र आपसी सहयोग एवं समझदारीका विषयमा कुराकानी भएको थियो। यसअघि आज छोङछिङ पुग्दा उनलाई सो महानगरका उपप्रमुख डाङ यानजेङ र चाङ गउजीले छोङछिङ विमानस्थलमा स्वागत गरेका थिए।
आजै प्रधानमन्त्री प्रचण्डले छोङछिङ एकेडेमी अफ एग्रिकल्चरल साइन्सेन्समा पुगी त्यहाँको वैज्ञानिक एवं आधुनिक कृषि प्रणालीबारे अध्ययन अवलोकन गरे। सो एकेडेमीमा कृषि उत्पादनको आधुनिक प्रयोग एवं उत्पादनको अवलोकन गरी जानकारी लिएका थिए। उनका साथमा परराष्ट्रमन्त्री एनपी साउदसहित भ्रमण दलका अन्य सदस्य पनि सहभागी छन्। उनी आज छोङछिङमा नै रहने कार्यक्रम छ।
