लोकपाटी न्यूजकाठमाडौं। प्रधानमन्त्री पुष्पकमल दाहाल ‘प्रचण्ड’ले जलवायु परिवर्तनका कारण नेपालले भोग्नुपरेको समस्याबाट समाधानका लागि यस पटक स्पष्टरुपमा दाबी पेश गर्नुपर्ने बताएका छन्। उनले भने, ‘जलवायुको मुद्दामा नेपालले महत्त्वपूर्ण पहल लिन सक्छ। यो मुद्दामा विश्वलाई नै हामीले नेतृत्व गर्ने गरी हामी प्रस्तुत हुनुपर्छ।’
कोप-२८ मा नेपाल कसरी प्रस्तुत हुने भन्नेबारेमा प्रधानमन्त्री निवास बालुवाटारमा आज परराष्ट्र मन्त्रालय, वन तथा वातावरण मन्त्रालयलगायतका सचिवसँगको छलफलमा प्रधानमन्त्री दाहालले नेपालले यस पटक प्रभावकारी र सशक्तरुपमा दाबी पेश गर्नुपर्ने बताएका हुन्। सो बैठकमा कोप-२८ को तयारीबारे ब्रिफिङ र नेपालको तयारीबारे छलफल भएको थियो।
प्रधानमन्त्री प्रचण्डले भने, ‘यो मुद्दाको ‘लिडर’ हामी हो। हाम्रा कागजपत्र हामी लिडर भएर प्रस्तुत हुने खालका हुनुपर्छ। जलवायुमा असर गर्ने तपाईंहरु सजाय भोग्ने हामी ? तपाईंहरुले गरेको प्रतिबद्धता किन पूरा नगरेको भनेर विश्वसामु प्रस्तुत होऔँ। यस पटक निवेदक होइन, दाबी प्रस्तुत गर्ने गरी प्रस्तुति रहन्छ।’
आगामी मङ्सिर ५ गते नेपालमा यसबारे सम्मेलनको आयोजना गरिने प्रधानमन्त्री प्रचण्डले बताए। उक्त सम्मेलनको निष्कर्षका साथ कोप-२८ मा प्रस्तुत हुने सरकारको तयारी छ। जलवायुका क्षेत्रमा आउने सहयोग सरकारमार्फत हुने कुरा दृढतापूर्वक राख्नुपर्ने प्रधानमन्त्री प्रचण्डको भनाइ छ। जलवायु परिवर्तनको असर न्यूनीकरणका लागि प्राप्त हुने विदेशी सहयोग र क्षतिपूर्ति सरकारी प्रणालीमा आउनुपर्ने उल्लेख गर्दै उनले यस विषयलाई पनि स्पष्टका साथ राख्नुपर्नेमा जोड दिए।
