लोकपाटी न्यूजकाठमाडौं। नेपाली काँग्रेसका महामन्त्री गगन थापाले बालकुमारी घटना भौतिक पूर्वाधार तथा यातायातमन्त्री प्रकाश ज्वालाको लापरबाहीले भएको आरोप लगाएका छन्। राज्यव्यवस्था तथा सुशासन समितिको सोमबारको बैठकमा उनले आन्दोलनबारे थाहा हुँदाहुँदै त्यही बाटोबाट सवारी गर्नु लापरबाही भएको बताएका हुन्।
महामन्त्री थापाले भने, ‘पर्सनल सेक्युरिटिज अफिसरहरूले सूचना लिइसक्दा पनि राज्य नेतृत्वले होइन होइन भनेर ठिक छ भन्यो भने त्यो बेलामा उसले रोक्दैन। त्यहाँ घटना हुँदै छ भन्ने थाहा पाउँदा पाउँदै यो जबरजस्ती हो। चरम लापरबाही हो, हेपेको हो। सामान्य व्यक्तिले गर्ने लापरबाहीले त कति थोक व्यहोर्नुपर्छ। त्यत्रो ओहोदामा रहेको व्यक्तिले गरेको लापरबाहीले गर्दा यत्रो ठूलो दुर्घटना भयो। यो समितिले मन्त्रीको लापरबाही हेर्छ कि हेर्दैन ? लापरबाही हो भने दण्ड हुन्छ।’
उनले साउनदेखिको इपीएसको विषय सम्बोधन नगर्नु सरकारको लापरबाही भएको पनि ठहर गरे। लामो समयदेखि इपीएसलाई लिएर आन्दोलन र विवाद भइरहेको विषयमा श्रम, रोजगार तथा सामाजिक सुरक्षामन्त्रीले समन्वय नगरेको महामन्त्री थापाले बताए।
‘यो त साउनदेखि भएको हो। मंसिरदेखि त निरन्तर आन्दोलन भइरहेको छ। यसमा गृहमन्त्रीज्यूले सामान्य जानकारी गराउनुभएको छ,’ उनले भने, ‘त्यसमा पनि हाम्रा केही आशंका छन्। यो समितिले गृह मन्त्रालयको राजनीतिक नेतृत्व र प्रहरी प्रशासनको सुरक्षाको नेतृत्वले ठिक ढंगले काम गरेको छ कि छैन ? यसको ल्याप्सेस कहाँ भयो भन्ने कुरासम्म पुग्छ कि पुग्दैन ?’
महामन्त्री थापाले अगाडि थपे, ‘श्रममन्त्रीको विषय पनि यहाँ छ। यो महत्त्वपूर्ण छ। साउनदेखिको विषयमा जानकारी राख्नुभयो कि भएन ? इपीएस कार्यालयमा समस्या भयो, भइरहेको छ। त्यो बेलामा पोल्टिकल लिडरसिप भनेको के हो ? श्रममन्त्रीको जिम्मेवारी होइन यो ? श्रममन्त्रीले यत्रो भइसकेपछि अलिकति अतिरिक्त जाने, भेट्ने, कुरा गर्ने सम्हाल्ने होइन ? जिम्मा के हो ? श्रममन्त्रीको बारेमा विभिन्न कुरा आएका छन्, गम्भीर कुरा उठेको छ, त्यसमा ठूलो अनुचित लाभ लिएको देखिन्छ। प्रधानमन्त्री कार्यालयलाई यसबारेमा जानकारी थियो कि थिएन ? इपीएसको बारेमा संवाद गरेको छ कि छैन ? संवाद गरेको भए यी कुराहरू हुँदैन थिए।’
थापाले माइतीघरको निषेधित क्षेत्र हटाइदिन गृहमन्त्री नारायणकाजी श्रेष्ठसँग अनुरोध गरेका छन्। उनले भने, ‘माइतीघरको निषेधित क्षेत्र हटाइदिनुस्। यसको पनि कारण छ । हेर्दा सामान्य लाग्छ। आज धोती जुलुस भयो, पोल्टिकल स्टेटमेन्ट हो। उहाँहरूले सरकारले सुन्छ भनेर माइतीघरमा देखाउन खोज्नुभएको हो। हिजो हामीले त्यही गरेको हो। तर, अहिले माइतीघरलाई निषेधित क्षेत्र बनाइसकेपछि बल प्रयोग गर्नुपरेको छ। बल प्रयोग गर्ने घटनाले बढाउँदै लैजाने त हो। हाम्रो डेमोक्रेसीमा हामीले एउटा ठाउँ बनाएको हो। यसको औचित्य छैन, यसको तत्काल खारेज गर्न अनुरोध गर्छु।’
