लोकपाटी न्यूजकाठमाडौं। राष्ट्रिय स्वतन्त्र पार्टी (रास्वपा)को प्रथम वडा अधिवेशन सुरु भएको छ। रास्वपाले कोशी, बागमती, गण्डकी, लुम्बिनी र सुदूरपश्चिमका ५६ वडाहरूमा आज प्रथम वडा अधिवेशन आयोजना गर्न लागेको हो।
रास्वपा सहमहामन्त्री तथा संगठन विभागका प्रमुख कविन्द्र बुर्लाकोटीका अनुसार कोशी प्रदेशमा १८, बागमतीमा १०, गण्डकीमा १६, लुम्बिनीमा ७ र सुदूरपश्चिममा ५ वटा वडाको अधिवेशन हुँदैछ। वडा अधिवेशनका लागि रास्वपाले केन्द्रीय नेताहरूलाई अनुगमनका लागि समेत खटाएको छ।
रास्वपाका उपसभापति डीपी अर्याल चितवन, सहमहामन्त्री कविन्द्र बुर्लाकोटी काठमाडौंको बुढानिलकण्ठ, केन्द्रीय सदस्य गणेश पराजुली काठमाडौं र अन्य पदाधिकारीहरू विभिन्न वडा अधिवेशनको अनुगमनका लागि खटिएका छन्। प्रदेश समितिका सदस्यहरूलाई भने निर्वाचन आयोगले पर्यवेक्षणका लागि विभिन्न वडाहरूमा खटाएको छ।
