अर्थतन्त्रलाई गति दिन सरकारले अग्रसरता दिइरहेको छ : नेता कार्की

gyanendra_bahadur_karki
लोकपाटी न्यूज
3 Shares

सङ्खुवासभा। नेपाली काँग्रेसका नेता एवं पूर्वअर्थमन्त्री ज्ञानेन्द्रबहादुर कार्कीले नेपालको अर्थतन्त्रले गति लिइसकेको बताएका छन्। खाँदबारीमा आज आयोजित पत्रकार सम्मेलनमा उनले मुलुकको अर्थतन्त्र पुरानैलयमा फर्किँदै गरेको दाबी गरे।

विश्वभर कोरोनापछि तहसनहस भएको अर्थतन्त्र बिस्तारै लयमा फर्किँदै गरेको भन्दै वर्तमान सत्ता गठबन्धन सरकारले अर्थतन्त्र लयमा फर्काउन काम गरिरहेको पूर्वअर्थमन्त्री कार्कीको भनाइ थियो। अर्थतन्त्रका सूचक सकारात्मक भएकाले यसलाई गति दिन साधन, स्रोत र सम्भावनालाई केन्द्रमा राखेर सरकारले अग्रसरता दिइरहेको उनले बताए।

‘एमसिसी नेपाललाई प्राप्त भएको सहायता हो,’ नेता कार्कीले भने, ‘यो पाँच वर्षमा सम्पन्न गर्नुपर्दछ। विद्युत्को क्षेत्रमा एमसिसी कोशेढुङ्गा साबित हुनेछ।’ व्यापार घाटालाई न्यूनीकरण गर्न र देशलाई समृद्ध गर्न पनि यसले महत्त्वपूर्ण भूमिका खेल्ने उनले बताए।

सङ्खुवासभामा निर्माणाधीन अरुण तेस्रो आयोजनाले देशको अर्थतन्त्रमा टेवा पुर्‍याउने बताउँदै उनले सबैभन्दा पहिला जिल्लावासीले लाभ लिनुपर्ने धारणा राखे। फरक प्रशङ्गमा काँग्रेस नेता कार्कीले राष्ट्रियसभा निर्वाचनमा सबै सिटमा गठबन्धनका उम्मेदवार विजयी हुने दाबी गरे। राष्ट्रियसभा निर्वाचनको सन्दर्भलाई लिएर नेता कार्की कार्यकर्तासँग भेटघाट गर्न कोशी प्रदेशका जिल्ला सोलुखम्बु, खोटाङ, भोजपुर हुँदै हिजो बेलुकी सङ्खुवासभा आइपुगेका हुन्।