युक्रेनमा रुसलाई हराउन असम्भव छ : पुटिन

Vladimir_Putin
लोकपाटी न्यूज
8 Shares

एजेन्सी। राष्ट्रपति भ्लादिमिर पुटिनले अमेरिकी टेलिभिजनका लागि अन्तरवार्ता कार्यक्रमका प्रस्तोता टकर काल्र्सनलाई बिहीबार दिएको अन्तर्वार्तामा युक्रेनमा रुसलाई परास्त गर्न ‘असम्भव’ छ भनेर पश्चिमा मुलुकले बुझ्नुपर्ने बताएका छन्। सन् २०१९ पछि पश्चिमा सञ्चारमाध्यमले प्रसारण गरेको पुटिनको यो पहिलो अन्तरवार्ता हो।

यद्यपि ह्वाइट हाउसका उम्मेदवार तथा पूर्व राष्ट्रपति डोनाल्ड ट्रम्पका निकट काल्र्सनले केही कूटनीतिक प्रश्नहरू सोध्दै रुसी इतिहास र पुटिनको विचारको बारेमा व्याख्या गर्ने अवसर दिएका थिए। अन्तरवार्तामा रुसी नेता पुटिनले रुसलाई पश्चिमी विश्वासघातको सिकारको रूपमा चित्रण गर्दै सन् २०२२ को फेब्रुअरीमा युक्रेनमाथि आक्रमण गर्ने आफ्नो निर्णयको बचाउ गरेका छन्।

अमेरिका, युरोपेली संघ र नेटोले युक्रेनलाई सहयोग गरेपनि रुस पराजित हुने छैन भन्ने कुरा पश्चिमले बुझेको उनले दाबी गरे। उनले भने, ‘अहिलेसम्म युद्धभूमिमा रुसलाई रणनीतिक हार बेहोर्ने विषयमा होहल्ला र चिच्याहट भइरहेको छ। तर अब तिनीहरूले यो सम्भव छैन भनेर महसुस गर्न थालेका छन्। मेरो विचारमा यो असम्भव छ।’

ट्रम्पको पक्षमा रहेका रिपब्लिकनले युक्रेनलाई हतियार र अन्य सैन्य सहायताको साथ समर्थन गर्न हिचकिचाइरहेको अमेरिकी संसद्को सन्देशले पनि रूसविरूद्धको पश्चिमा सहकार्य कमजोर भएको पुष्टि हुने उनले बताए। उनले भने, ‘युद्धको विषयमा हामी अमेरिकी नेतृत्वलाई के भनिरहेका छौं भने यदि वास्तवमै लडाइँ रोक्न चाहनुहुन्छ भने तपाईंले हतियार आपूर्ति बन्द गर्नुपर्छ।’

नाटो सदस्य राष्ट्र पोल्याण्ड र लाटभिया वा सामान्यतया युरोपेली महाद्वीपमा आक्रमण गने बारे मस्कोले विचार गर्छ कि गर्दैन भन्ने प्रश्नमा पुटिनले भने, ‘यो प्रश्नको विषय होइन। पोल्याण्ड, लाटभिया वा अन्य कुनै पनि ठाउँमा हाम्रो कुनै चासो छैन। हामी किन त्यसो गर्छौं? यो त्रासमात्र हो।’

उनले पोल्याण्डसँग युद्ध ‘केवल पोल्याण्डले रुसमाथि आक्रमण गर्‍यो भनेमात्र हुने बताए। सन् २०२० को राष्ट्रपतीय चुनावमा बाइडेनले ट्रम्पविरुद्ध प्रतिस्पर्धा गर्ने अपेक्षा गरिएको अमेरिकी चुनावपछि नेतृत्व परिवर्तनबारे सोधिएको प्रश्नमा पुटिनले आफूले थोरै परिवर्तन देख्ने संकेत गर्दै भने, ‘तपाईंले मलाई सोध्नुभयो कि अर्को नेता आएर केही परिवर्तन गर्नुहुन्छ ? यो नेताको कुरा होइन। यो कुनै व्यक्ति विशेषको व्यक्तित्वको बारेमा होइन।

रुसले युक्रेनमा आक्रमण गरेको दुई वर्ष पूरा भएको पूर्वसन्ध्यामा फक्स न्युजका पूर्व प्रस्तोतासँगको दुई घण्टा लामो अन्तर्वार्तामा पुटिनले जेलमा रहेका वाल स्ट्रिट जर्नलका रिपोर्टर इभान गेर्शकोभिचसँग ‘सम्झौता गर्न सकिने’ बताएका छन्। ‘विशेष सेवा च्यानलहरूमार्फत केही सर्तहरूमा छलफल भइरहेको छ,’ उनले भने।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्