संकटमा पुगेको अर्थतन्त्र लयमा फर्कियो : प्रधानमन्त्री

Prachanda_Mao
लोकपाटी न्यूज
5 Shares

नुवाकोट। प्रधानमन्त्री पुष्पकमल दाहाल ‘प्रचण्ड’ले कमजोर अवस्थामा पुगेको देशको अर्थतन्त्र क्रमशः सुधारको बाटोमा ल्याउन सफल भएको बताएका छन्। नुवाकोटको विदुरमा आजदेखि सुरु भएको आठौँ नुवाकोट महोत्सवलाई सम्बोधन गर्दै उनले एक वर्षअघि आफू प्रधानमन्त्री हुँदाको समयमा निकै संकटमा पुगेको देशको अर्थतन्त्र अहिले लयमा फर्किएको स्पष्ट पारेका हुन्।

‘अर्थतन्त्र सुधारका सूचकहरू अहिले सकारात्मक अवस्थामा छन्,’ उनले भने, ‘देश र विदेशका विभिन्न निकाय तथा सरोकारवालासँग निरन्तरको बहसका क्रममा प्रधानमन्त्री कार्यालय, अर्थ मन्त्रालय र राष्ट्र बैंकको थुप्रै प्रयासले संकटमा पुगेको अर्थतन्त्र लयमा ल्याउन सफल भएका हौं।’ तेह्र महिनाअघि आफू तेस्रो पटक प्रधानमन्त्री हुँदा कमजोर भएपनि अहिले अर्थतन्त्रमा निकै सुधार भएकाले यही क्रम रहेमा बिस्तारै मुलुकलाई समृद्धितर्फ लैजान सकिने प्रधानमन्त्री प्रचण्डको विश्वास छ।

‘अहिले बैंकको ब्याजदर घट्दै गएको छ। पर्यटनको आवागमनमा सुधार तथा राजस्व संकलनमा १० प्रतिशतले वृद्धि हुँदै विदेशी मुद्राको सञ्चिति इतिहासमा नै सुधार गरेर एक वर्षलाई पुग्ने बनाएका छौं,’ उनले भने, ‘रेमिट्यान्समा ३० प्रतिशत वृद्धि, जग्गाको कारोबार चलायमान र जलवायु परिवर्तनको कारण पुगेको असरलाई प्रतिरक्षा गर्न प्राप्त अन्तर्राष्ट्रिय सहयोगको आकार बढाउँदै ल्याएकाले कमजोर बनेको अर्थतन्त्र लयमा फर्किएको हो।’

आगामी आर्थिक वर्षको नीति तथा कार्यक्रम एवं बजेट निर्माणको कार्य प्रारम्भ भएकाले सुध्रिएको अर्थतन्त्रको कारण उत्पादन, रोजगार र जनमुखी बजेट ल्याउन केन्द्रित हुने प्रधानमन्त्री प्रचण्डले उल्लेख गरे। उत्पादन र रोजगारका निमित्त कृषि क्षेत्रको विकासलाई आधुनिकीकरणतर्फ लम्काउने प्रयासमा वर्तमान सरकार सक्रियरूपमा लागिरहेको उनको भनाइ थियो। पर्यटन क्षेत्रको विकासका लागि छिमेकी मुलुक चीन र भारतीय समकक्षीसँग छलफल भइरहेकाले देशको विकास र समृद्धि छिट्टै नयाँ चरणमा प्रवेश गर्ने प्रधानमन्त्री प्रचण्डले विश्वास व्यक्त गरे।

प्रतिक्रिया दिनको लागि यहाँ क्लिक गर्नुहोस्

तपाईंको प्रतिक्रिया यहां लेख्नुहोस्